మోనాలిసా వివాహంపై 'పోక్సో' నీడ: చిక్కుల్లో భర్త ఫర్మాన్ ఖాన్!
కుంభమేళాలో పూసలు అమ్ముకుంటూ తన సహజ సిద్ధమైన అందంతో ఓవర్నైట్ లో సోషల్ మీడియా సెన్సేషన్గా మారిన మోనాలిసా జీవితం ఇప్పుడు ఊహించని మలుపులు తిరుగుతోంది. ప్రేమ వివాహం, లవ్ జిహాద్ ఆరోపణల పర్వం దాటి ఇప్పుడు ఈ వ్యవహారం పోక్సో (POCSO) కేసు వరకు వెళ్లడం సంచలనంగా మారింది.
నేషనల్ కమిషన్ ఫర్ షెడ్యూల్డ్ ట్రైబ్స్ (NCST) జరిపిన తాజా విచారణలో మోనాలిసా వివాహ సమయానికి మైనర్ అని తేలడం ఇప్పుడు ప్రధాన మలుపు. చట్టపరంగా పెళ్లికి కావాల్సిన వయసు లేకపోవడంతో, ఆమెను వివాహం చేసుకున్న ఫర్మాన్ ఖాన్పై తీవ్రమైన సెక్షన్ల కింద కేసు నమోదైనట్లు తెలుస్తోంది.
కేరళలో జరిగిన వీరి వివాహాన్ని దర్శకుడు సనోజ్ మిశ్రా 'లవ్ జిహాద్'గా అభివర్ణించగా, దానికి ప్రతిగా మోనాలిసా ఆయనపై లైంగిక దాడి ఆరోపణలు చేయడం అప్పట్లో పెద్ద దుమారం రేపింది. ప్రస్తుతం వెలుగులోకి వచ్చిన మైనర్ అంశం కారణంగా, ఫర్మాన్ ఖాన్ జైలుకు వెళ్లాల్సిన పరిస్థితి ఏర్పడింది. ఒకప్పుడు ప్రేమికులుగా సోషల్ మీడియాలో మెరిసిన ఈ జంట, ఇప్పుడు చట్టపరమైన సమస్యలను ఎదుర్కొంటున్నారు.
మోనాలిసా వయసు విషయంలో ప్రభుత్వం దగ్గర ఉన్న ఆధారాలు నిజమేనా? లేక దీని వెనుక ఏదైనా రాజకీయ లేదా సామాజిక కుట్ర ఉందా? అని సోషల్ మీడియా వేదికగా నెటిజన్లు రకరకాలుగా చర్చించుకుంటున్నారు.