చిన్నారుల్లో రక్తహీనతను దూరం చేసే సూపర్ ఫుడ్స్ ఇవే!

పిల్లల్లో ఈ మధ్యకాలంలో రక్తహీనత సమస్య ఎక్కువగా కనిపిస్తోంది. సరైన పోషకాహారం తీసుకోకపోవడం, ఐరన్ లోపం వంటి కారణాలతో వారిలో రక్తం శాతం తగ్గిపోతుంది. అయితే, కొన్ని ప్రత్యేకమైన ఆహారాలను వారి రోజువారీ డైట్‌లో చేర్చడం ద్వారా ఈ సమస్యను సమర్థవంతంగా అధిగమించవచ్చని పోషకాహార నిపుణులు సూచిస్తున్నారు.

ముఖ్యంగా, పిల్లల్లో హీమోగ్లోబిన్ స్థాయిలను పెంచడంలో రాగి జావ, కిస్మిస్‌లు, హలీమ్ గింజలు (అలివ్ సీడ్స్) ఎంతగానో సహాయపడతాయి. వీటిని రోజూ ఏదో ఒక రూపంలో అందించడం మంచిది. అలాగే, ఇనుము పుష్కలంగా ఉండే అటుకులను ఇవ్వడం వల్ల శరీరానికి ఐరన్‌తో పాటు తక్షణ శక్తినిచ్చే కార్బోహైడ్రేట్లు కూడా అందుతాయి.

రక్త కణాల తయారీకి ఆకుకూరలు, నువ్వులు, వివిధ రకాల పప్పులు, గుడ్లు చాలా అవసరం. వీటిని పిల్లల భోజనంలో భాగం చేయడం వల్ల రక్త వృద్ధి మెరుగుపడుతుంది.

శరీరానికి ఐరన్ సరిగ్గా అందాలంటే విటమిన్ సి చాలా ముఖ్యం. మనం తీసుకున్న ఆహారంలోని ఐరన్‌ను శరీరం గ్రహించడానికి విటమిన్ సి దోహదపడుతుంది. ఇందుకోసం నారింజ, నిమ్మ, జామ, ఉసిరి, బొప్పాయి, క్యాప్సికం వంటి పండ్లు, కూరగాయలను పిల్లలకు క్రమం తప్పకుండా తినిపించాలి. ఈ మార్పులతో పిల్లలను ఆరోగ్యంగా, చురుగ్గా ఉంచవచ్చని నిపుణులు చెబుతున్నారు.