మే నుంచి హ్యుందాయ్ కార్ల ధరలు పెంపు.. 1% వరకు భారం!

ప్రముఖ ఆటోమొబైల్ తయారీ సంస్థ హ్యుందాయ్ మోటార్ ఇండియా తమ కార్ల ధరలను పెంచుతున్నట్లు బుధవారం అధికారికంగా ప్రకటించింది. ముడిసరుకులు, ఇతర ఉత్పత్తి వ్యయాలు పెరగడమే ఇందుకు కారణమని తెలిపింది. పెంచిన ధరలు 2026 మే 1 నుంచి దేశవ్యాప్తంగా అమలులోకి రానున్నాయి. ఈ నిర్ణయంతో అన్ని మోడళ్లపై గరిష్టంగా 1 శాతం వరకు భారం పడనుంది.

ఈ ఏడాదిలో హ్యుందాయ్ తమ వాహనాల ధరలను పెంచడం ఇది రెండోసారి కావడం గమనార్హం. పెరుగుతున్న ఇన్ పుట్ ఖర్చులు, లాజిస్టిక్స్ వ్యయాల భారాన్ని వీలైనంత వరకు తామే భరిస్తున్నామని వెల్లడించిన కంపెనీ.. తప్పనిసరి పరిస్థితుల్లోనే ఈ స్వల్ప పెంపును వినియోగదారులకు బదిలీ చేస్తున్నామని ఒక ప్రకటనలో వివరించింది. ఎంచుకునే మోడల్ మరియు వేరియంట్‌ను బట్టి ఈ ధరల పెరుగుదలలో తేడాలు ఉంటాయని స్పష్టం చేసింది.

ప్రస్తుతం ఆటోమొబైల్ రంగంలో ఉక్కు, అల్యూమినియం వంటి కీలక లోహాల ధరలు అధికంగా ఉన్నాయి. ఈ ప్రభావంతో ఇతర కార్ల కంపెనీలు కూడా ధరల పెంపు దిశగా యోచిస్తున్నాయి. కాగా, హ్యుందాయ్ ఇటీవలే మార్చి నెలలో 55,064 యూనిట్ల విక్రయాలతో అత్యధిక దేశీయ అమ్మకాలను నమోదు చేయడం విశేషం.