Sudhakar: రాజకీయాలు వేరు.. గౌరవం వేరు: ప్రత్యర్థి పాదాలకు నమస్కరించిన ఏఐఏడీఎంకే అభ్యర్థి

తమిళనాడు ఎన్నికల నామినేషన్ల పర్వంలో భాగంగా గుమ్మడిపూండి నియోజకవర్గంలో ఒక విలక్షణమైన ఘటన చోటుచేసుకుంది. డీఎంకే - అన్నాడీఎంకే అభ్యర్థులు ముఖాముఖి ఎదురైనప్పుడు, వారి మధ్య ఉన్న గురుశిష్యుల బంధం రాజకీయ విభేదాలను పక్కకు నెట్టింది.

వివరాల్లోకి వెళితే... డీఎంకే అభ్యర్థి టీజే గోవిందరాజన్ తన నామినేషన్ దాఖలు చేసి రిటర్నింగ్ అధికారి కార్యాలయం నుంచి బయటకు వస్తుండగా, అన్నాడీఎంకే అభ్యర్థి సుధాకర్ నామినేషన్ వేయడానికి లోపలికి వెళుతున్నారు. గోవిందరాజన్ కనిపించగానే, సుధాకర్ వెళ్ళి ఆయన పాదాలకు నమస్కరించి ఆశీర్వాదం తీసుకున్నారు. గోవిందరాజన్ కూడా ఏమాత్రం సంకోచించకుండా సుధాకర్‌ను చిరునవ్వుతో దగ్గరకు తీసుకుని, ఆప్యాయంగా ఆశీర్వదించారు.

ఈ ఘటనపై ఆరా తీయగా ఆసక్తికర విషయాలు వెలుగుచూశాయి. గతంలో సుధాకర్, గోవిందరాజన్ వద్ద అనుచరుడిగా పనిచేశారు. రాజకీయంగా ఇప్పుడు ఇద్దరూ వేర్వేరు పార్టీల తరఫున ఒకే నియోజకవర్గంలో పోటీ పడుతున్నప్పటికీ, తన పాత గురువుపై ఉన్న గౌరవాన్ని సుధాకర్ ఈ విధంగా చాటుకున్నారు. సాధారణంగా ఎన్నికల సమయంలో అభ్యర్థుల మధ్య తీవ్రమైన విమర్శలు, ప్రతివిమర్శలు చోటుచేసుకుంటాయి. కానీ, ఈ ఇద్దరు నేతలు ప్రదర్శించిన సంస్కారం, వ్యక్తిగత విలువలు చూసి అందరూ ప్రశంసిస్తున్నారు. రాజకీయాలు కేవలం సిద్ధాంతాలకే పరిమితమని, వ్యక్తిగత సంబంధాలు అంతకు మించినవని ఈ ఘటన నిరూపించిందని విశ్లేషకులు అభిప్రాయపడుతున్నారు.