Vijay: విజయ్, త్రిషలపై వ్యాఖ్యల దుమారం.. క్లారిటీ ఇచ్చిన సముద్రఖని

కోలీవుడ్ స్టార్ హీరో, టీవీకే పార్టీ అధినేత విజయ్, హీరోయిన్ త్రిషలకు సంబంధించిన ఒక సున్నితమైన అంశంపై నటుడు, దర్శకుడు సముద్రఖని చేసిన వ్యాఖ్యలు పెను దుమారాన్ని రేపుతున్నాయి. ఒక పెళ్లి వేడుకలో విజయ్, త్రిషలు కలిసి కనిపించిన తీరుపై సముద్రఖని అసంతృప్తి వ్యక్తం చేసిన వీడియో ప్రస్తుతం వైరల్ అవుతోంది. 

"ఇదేమైనా ఆటా? వ్యక్తిగత విషయాలను ఇలా బహిరంగపరచాలా? ఎవరి మీద పగ తీర్చుకుంటున్నారు? అంతా సవ్యంగా సాగుతున్న సమయంలో ఇలాంటివి అవసరమా? దీనివల్ల పార్టీలోని సపోర్టర్స్ కూడా దూరమవుతున్నారు" అని సముద్రఖని ఆ వీడియోలో ఆవేదన వ్యక్తం చేశారు. ఈ వ్యాఖ్యలు చర్చనీయాంశం అయ్యాయి.

అయితే ఈ వివాదంపై స్పందిస్తూ, తన మాటలను తప్పుగా అర్థం చేసుకున్నారని సముద్రఖని పేర్కొన్నారు. ఎవరో కావాలనే తన మాటలను మధ్యలో రికార్డ్ చేసి వక్రీకరించారని, తాను నిజాయతీగానే మాట్లాడానని స్పష్టం చేశారు. విజయ్ రాజకీయ ప్రస్థానానికి మొదటి నుంచి మద్దతు ఇచ్చింది తానేనని, అందుకే ఆయన విషయంలో ఏదైనా తేడా జరిగితే తనకు బాధ ఉంటుందని భావోద్వేగంగా చెప్పారు. తన ఆలోచనలను పంచుకున్నందుకు తనకు ఎలాంటి పశ్చాత్తాపం లేదని, ఈ చిన్న విషయాన్ని అనవసరంగా పెద్దది చేశారని ఆయన అన్నారు.