ఎగుమతి చేయడానికి చమురు నిల్వలు ఉంటేకదా..: ఇరాన్

ఎగుమతి చేయడానికి తమ వద్ద చమురు నిల్వలు లేవని ఇరాన్ సంచలన ప్రకటన చేసింది. దేశీయ అవసరాలు, వ్యూహాత్మక నిల్వలకు మాత్రమే ప్రస్తుతం చమురు అందుబాటులో ఉందని, అంతర్జాతీయ మార్కెట్‌కు సరఫరా చేసే స్థితిలో తమ దేశం లేదని ఇరాన్ విదేశాంగ శాఖ సహాయ మంత్రి అబ్బాస్ అరాఘ్చీ స్పష్టం చేశారు. అమెరికా విధించిన ఆంక్షల కారణంగానే చమురు ఉత్పత్తి, రవాణాపై తీవ్ర ప్రభావం పడిందని ఆయన అంగీకరించారు.

ఇరాన్ అక్రమంగా చమురు ఎగుమతి చేస్తోందంటూ అమెరికా చేస్తున్న ఆరోపణలను అరాఘ్చీ తీవ్రంగా ఖండించారు. ఇవన్నీ కేవలం తమ దేశ ప్రతిష్టను దెబ్బతీయడానికి, ప్రపంచ దేశాలను అయోమయానికి గురిచేయడానికి అమెరికా ఆడుతున్న ‘మైండ్ గేమ్స్’ అని ఆయన అభివర్ణించారు. వాషింగ్టన్ ఇలాంటి తప్పుడు ప్రచారాలతో తమపై ఆర్థిక యుద్ధం చేస్తోందని ఆరోపించారు.

చమురు ఎగుమతులపై ఆధారపడిన ఆర్థిక మూలాలను దెబ్బతీసి, తమను లొంగదీసుకోవాలని అమెరికా ప్రయత్నిస్తోందని, కానీ తమ సార్వభౌమత్వాన్ని కాపాడుకోవడానికి ఎప్పుడూ సిద్ధంగా ఉంటామని అరాఘ్చీ తేల్చిచెప్పారు. ఇరాన్ తాజా ప్రకటనతో అంతర్జాతీయ ఇంధన మార్కెట్‌లో కలకలం రేగింది. ప్రపంచానికి చమురు సరఫరా చేసే ప్రధాన దేశాల్లో ఇరాన్ ఒకటి కావడంతో, తాజా ప్రకటన ఇంధన ధరలు భారీగా పెరిగేందుకు దారితీయవచ్చని విశ్లేషకులు అంచనా వేస్తున్నారు. ముఖ్యంగా ఇరాన్ నుంచి అధికంగా చమురు దిగుమతి చేసుకునే ఆసియా దేశాలపై ఈ ప్రభావం ఎక్కువగా పడే అవకాశం ఉంది.