ఏపీ ముఖ్యమంత్రి చంద్రబాబుకు థ్యాంక్స్ చెప్పిన ఐకాన్ స్టార్ అల్లు అర్జున్

టాలీవుడ్ ఐకాన్ స్టార్ అల్లు అర్జున్, ఆంధ్రప్రదేశ్ ముఖ్యమంత్రి చంద్రబాబుకు హృదయపూర్వక ధన్యవాదాలు తెలిపారు. నిన్న తన సోదరుడు అల్లు శిరీష్, నయనికా రెడ్డి దంపతులను ఆశీర్వదించేందుకు చంద్రబాబు వ్యక్తిగతంగా తమ నివాసానికి రావడం పట్ల అల్లు అర్జున్ సంతోషం వ్యక్తం చేశారు. ఈ మేరకు సోషల్ మీడియాలో ఒక ప్రత్యేక పోస్ట్ ద్వారా తన కృతజ్ఞతలను పంచుకున్నారు.

చంద్రబాబు తమ ఇంటికి వచ్చిన సమయంలో తాను విదేశాల్లో ఉన్నానని, అందుకే ఆయన్ను ప్రత్యక్షంగా కలుసుకోలేకపోయానని అల్లు అర్జున్ తెలిపారు. అయితే, ఫోన్‌లో ఆయనతో మాట్లాడటం ఎంతో ఆనందాన్నిచ్చిందని చెప్పారు. నూతన జంట శిరీష్, నయనికలకు చంద్రబాబు అందించిన ఆశీస్సులు, చూపిన ఆత్మీయతకు తాము ఎప్పటికీ రుణపడి ఉంటామని పేర్కొన్నారు.

ఈ సందర్భంగా అల్లు అర్జున్ తన పోస్టులో ఇలా రాసుకొచ్చారు: "గౌరవ ఏపీ ముఖ్యమంత్రి చంద్రబాబు గారూ.. మా ఇంటికి వ్యక్తిగతంగా వచ్చి శిరీష్, నయనికలను ఆశీర్వదించి, మా కుటుంబానికి శుభాకాంక్షలు తెలిపినందుకు ధన్యవాదాలు. ఆ సమయంలో నేను విదేశాల్లో ఉన్నందుకు క్షమించండి. కానీ, మీతో ఫోన్‌లో మాట్లాడటం నాకు సంతోషాన్నిచ్చింది. నూతన జంటకు మీరు అందించిన ఆశీస్సులు, మీ ఆత్మీయతకు మేం ఎంతో కృతజ్ఞులం. మీరు చూపిన ఈ చొరవ నా మనసును ఎంతగానో తాకింది" అని పేర్కొన్నారు. ప్రస్తుతం ఈ పోస్ట్ సోషల్ మీడియాలో వైరల్ అవుతోంది.