నా వేలు పట్టుకున్న చిన్నారివి.. ఇప్పుడు నాకే బ్లాక్‌బస్టర్ ఇచ్చావు: కూతురిపై చిరు భావోద్వేగ పోస్ట్

తన కుమార్తె, నిర్మాత సుస్మిత కొణిదెల పుట్టినరోజు సందర్భంగా మెగాస్టార్ చిరంజీవి సోషల్ మీడియాలో ఓ భావోద్వేగ పోస్ట్ పెట్టారు. ఒకప్పుడు తన వేలు పట్టుకుని నడిచిన చిన్నారి, ఇప్పుడు తన సినిమాకే నిర్మాతగా మారి బ్లాక్‌బస్టర్ విజయాన్ని అందించిందని, ఇది తండ్రిగా తనకు ఎంతో గర్వకారణమని ఆయన పేర్కొన్నారు.

తన ఎక్స్ ఖాతాలో చిరంజీవి ఈ మేరకు ఓ పోస్ట్ చేశారు. "నా ప్రియమైన సుస్మితకు పుట్టినరోజు శుభాకాంక్షలు. ఒకప్పుడు నా వేలు పట్టుకుని నడిచిన చిన్నారి నుంచి ఈరోజు ధైర్యంగా, బాధ్యతగల మహిళగా ఎదిగావు. నా సినిమాలు చూస్తూ ఆనందించే నువ్వే, ఇప్పుడు ఓ సినిమాను నిర్మించి, నాకు చిరస్మరణీయమైన బ్లాక్‌బస్టర్ అందించడం తండ్రిగా నాకు చాలా ప్రత్యేకమైన గర్వాన్ని ఇచ్చింది. నీకు ఎల్లప్పుడూ ఆరోగ్యం, సంతోషం, విజయం కలగాలని కోరుకుంటున్నాను. లవ్ యూ హనీ పాపా" అని చిరంజీవి రాసుకొచ్చారు.

మెగాస్టార్ చిరంజీవి నటించిన 'మన శంకర వర ప్రసాద్ గారు' చిత్రానికి సుస్మిత కొణిదెల నిర్మాతగా వ్యవహరించిన విషయం తెలిసిందే. ఈ ఏడాది జనవరిలో తన తండ్రితో కలిసి పనిచేయడంపై సుస్మిత మాట్లాడుతూ, నేర్చుకోవాలనే తపన ఉంటే నాన్న నుంచి ప్రతిరోజూ ఒక పాఠం నేర్చుకోవచ్చని అన్నారు. ఒక పని మొదలుపెట్టాక, దానికే జీవితాన్ని అంకితం చేయాలని, నిజాయతీగా, కష్టపడి పనిచేయాలని ఈ సినిమా ద్వారా ఆయన నుంచి నేర్చుకున్నానని తెలిపారు.

"ఇంట్లో నాన్న మాతో సరదాగా, ప్రేమగా ఉంటారు. కానీ, సెట్‌లోకి అడుగుపెట్టాక ఆయన దృష్టి మొత్తం పాత్రపైనే ఉంటుంది. ఈ రోజుకీ తొలి సినిమా నటుడిలా ఆయన సిద్ధమవుతారు" అని సుస్మిత వివరించారు.