ఇరాన్‌పై యుద్ధంలో ఏఐ ఆయుధాలు రంగంలోకి దించిన అమెరికా

ఇరాన్‌తో కొనసాగుతున్న సైనిక ఘర్షణలో అమెరికా సరికొత్త టెక్నాలజీని వాడుతోంది. 'ఆపరేషన్ ఎపిక్ ఫ్యూరీ' పేరుతో చేపట్టిన ఈ యుద్ధంలో ఆర్టిఫిషియల్ ఇంటెలిజెన్స్ (ఏఐ), అటానమస్ వ్యవస్థలను వినియోగిస్తున్నట్లు అమెరికా రక్షణ మంత్రి పీట్ హెగ్సెత్ బుధవారం నాడు ధృవీకరించారు. పెంటగాన్‌లో జరిగిన మీడియా సమావేశంలో ఆయన మాట్లాడుతూ, స్మార్ట్ ఏఐ సామర్థ్యాలున్న డ్రోన్లు, ఇతర వ్యవస్థలను రంగంలోకి దించినట్లు తెలిపారు. అయితే, భద్రతా కారణాల దృష్ట్యా వాటి పూర్తి వివరాలను వెల్లడించలేనని స్పష్టం చేశారు.

ఈ ఆపరేషన్‌లో భాగంగా ఇప్పటివరకు 2,000కు పైగా లక్ష్యాలను ధ్వంసం చేశామని జాయింట్ చీఫ్స్ ఆఫ్ స్టాఫ్ ఛైర్మన్, జనరల్ డాన్ కెయిన్ తెలిపారు. ప్రధానంగా మూడు లక్ష్యాలతో ఈ దాడులు చేస్తున్నట్లు ఆయన వివరించారు. ఇరాన్ బాలిస్టిక్ క్షిపణి వ్యవస్థలను పూర్తిగా నాశనం చేయడం, వారి నౌకాదళాన్ని నిర్వీర్యం చేయడం, తిరిగి సైనిక సామర్థ్యాన్ని వేగంగా పునరుద్ధరించుకోకుండా చూడటమే తమ ఉద్దేశమని పేర్కొన్నారు.

యుద్ధ వ్యూహాన్ని కూడా మార్చినట్లు అమెరికా సైన్యం తెలిపింది. దూరం నుంచి జరిపే దాడుల స్థానంలో, ఇప్పుడు నేరుగా ఇరాన్ గగనతలంలోకి వెళ్లి కచ్చితమైన లక్ష్యాలపై దాడులు చేస్తున్నామని జనరల్ కెయిన్ చెప్పారు. తమ దాడుల తర్వాత ఇరాన్ క్షిపణి ప్రయోగాల తీవ్రత గణనీయంగా తగ్గిందని, పోరాటం మొదలైన నాటితో పోలిస్తే ఇవి 86 శాతం తగ్గాయని వెల్లడించారు. అయితే, ఈ ఆపరేషన్ ఇంకా ముగియలేదని, ఇది చాలా సంక్లిష్టమైనది, ప్రమాదకరమైనదని ఆయన పేర్కొన్నారు.