గూగుల్ సీఈఓ సుందర్ పిచాయ్ హోలీ శుభాకాంక్షలు... భారతీయ మూలాలను స్మరించుకుంటూ పోస్ట్

టెక్ దిగ్గజం గూగుల్ సీఈఓ సుందర్ పిచాయ్ తన భారతీయ మూలాలను మరోసారి చాటుకున్నారు. రంగుల పండుగ హోలీ సందర్భంగా ఆయన తన ఇన్‌స్టాగ్రామ్ ఖాతా ద్వారా ప్రపంచవ్యాప్తంగా ఉన్న తన అనుచరులకు ప్రత్యేక శుభాకాంక్షలు తెలిపారు. హోలీని "రంగులు, కమ్యూనిటీ, మరియు కొత్త ఆరంభాలకు ఒక వేడుక" అని అభివర్ణిస్తూ ఆయన చేసిన పోస్ట్ అందరినీ ఆకట్టుకుంటోంది.

ఈ పోస్ట్‌లో భాగంగా ముంబైకి చెందిన ఫొటోగ్రాఫర్ ప్రజయ్ కట్కోరియా తీసిన అద్భుతమైన ఫొటోను పిచాయ్ పంచుకున్నారు. తన కంపెనీ ఉత్పత్తులను ప్రమోట్ చేసే ట్రెండ్‌ను కొనసాగిస్తూ, ఈ ఫొటోను గూగుల్ పిక్సెల్ 8 ప్రో ఫోన్‌తో తీసినట్లు ఆయన పేర్కొన్నారు. "రంగులు, కమ్యూనిటీ, కొత్త ఆరంభాలకు ఇది ఒక వేడుక. అందరికీ హోలీ శుభాకాంక్షలు! ఈ అద్భుతమైన ఫొటోను పిక్సెల్ 8 ప్రోలో @prajai_k తీశారు" అని పిచాయ్ తన పోస్ట్‌లో రాశారు. గూగుల్ సీఈఓ నుంచి ప్రశంసలు అందడంతో ఫొటోగ్రాఫర్ కట్కోరియా ఆనందం వ్యక్తం చేశారు. "సుందర్ పిచాయ్ సర్, ఇది నాకు చాలా ప్రత్యేకం! అందరికీ హోలీ శుభాకాంక్షలు" అని ఆయన కామెంట్ చేశారు.

పిచాయ్ తన భారతీయ మూలాలను మరువకుండా పండుగను జరుపుకోవడం పట్ల నెటిజన్లు ప్రశంసలు కురిపిస్తున్నారు. గతేడాది కూడా ఆయన పిక్సెల్ యూజర్లు తీసిన హోలీ ఫొటోలను షేర్ చేసిన విషయం తెలిసిందే.