జమ్మూకశ్మీర్ రంజీ విజయంపై ప్రధాని మోదీ ప్రశంసలు

జమ్మూకశ్మీర్ క్రికెట్ జట్టు తొలిసారి రంజీ ట్రోఫీ టైటిల్‌ను కైవసం చేసుకుని చరిత్ర సృష్టించింది. రంజీ ట్రోఫీ 2025-26 సీజన్ విజేతగా నిలిచిన జమ్మూకశ్మీర్ జట్టుపై ప్రధాన మంత్రి నరేంద్ర మోదీ ప్రశంసల వర్షం కురిపించారు. ఈ విజయం ఆ ప్రాంత ప్రజలకు గర్వకారణమని, జట్టు పట్టుదల, క్రమశిక్షణ, క్రీడాస్ఫూర్తికి ఇది నిదర్శనమని ప్రధాని పేర్కొన్నారు.

ప్రధాని మోదీ ఎక్స్ వేదికగా స్పందిస్తూ.. "తొలిసారి రంజీ ట్రోఫీ గెలుచుకున్న జమ్మూకశ్మీర్ జట్టుకు అభినందనలు. ఈ చారిత్రక విజయం అక్కడ పెరుగుతున్న క్రీడా ప్రతిభను చాటిచెబుతోంది. ఈ గెలుపు ఎందరో యువ క్రీడాకారులకు స్ఫూర్తిగా నిలుస్తుందని ఆశిస్తున్నాను" అని తెలిపారు.

హుబ్లీ క్రికెట్ మైదానంలో జరిగిన ఫైనల్ మ్యాచ్‌లో ఎనిమిది సార్లు ఛాంపియన్‌గా నిలిచిన బలమైన కర్ణాటక జట్టుపై జమ్మూకశ్మీర్ పైచేయి సాధించింది. 67 ఏళ్ల సుదీర్ఘ నిరీక్షణ తర్వాత దేశవాళీ క్రికెట్‌లో జమ్మూకశ్మీర్ ఈ ప్రతిష్ఠాత్మక టైటిల్‌ను సొంతం చేసుకుంది. తొలి ఇన్నింగ్స్‌లో శుభమ్ పుండిర్ సెంచరీతో రాణించడంతో జమ్మూకశ్మీర్ 584 పరుగుల భారీ స్కోరు సాధించింది. బౌలింగ్‌లో ఆకిబ్ నబీ దార్ 5 వికెట్లు పడగొట్టడంతో కర్ణాటక 293 పరుగులకే ఆలౌట్ అయ్యింది.

రెండో ఇన్నింగ్స్‌లోనూ జమ్మూకశ్మీర్ బ్యాటర్లు కమ్రాన్ ఇక్బాల్ (160), సాహిల్ లోత్రా సెంచరీలతో చెలరేగారు. జట్టు స్కోరు 342/4 వద్ద ఉన్నప్పుడు కెప్టెన్ పరాస్ డోగ్రా ఇన్నింగ్స్ డిక్లేర్ చేశారు. మ్యాచ్ డ్రాగా ముగిసినప్పటికీ, భారీ తొలి ఇన్నింగ్స్ ఆధిక్యం ఆధారంగా జమ్మూకశ్మీర్ విజేతగా నిలిచింది.