రంజీ ట్రోఫీ గెలిచి చరిత్ర సృష్టించిన జమ్ము కశ్మీర్ ఆటగాళ్లకు భారీ నజరానా

దేశవాళీ క్రికెట్ చరిత్రలో జమ్మూ కశ్మీర్ జట్టు సరికొత్త అధ్యాయాన్ని లిఖించింది. హుబ్బళ్లి వేదికగా జరిగిన రంజీ ట్రోఫీ ఫైనల్ పోరులో ఎనిమిది సార్లు ఛాంపియన్‌గా నిలిచిన కర్ణాటకపై ఆధిపత్యం చెలాయించి, తొలిసారి రంజీ టైటిల్‌ను కైవసం చేసుకుంది. ఈ అద్భుత విజయంపై జమ్మూ కశ్మీర్ ముఖ్యమంత్రి ఒమర్ అబ్దుల్లా హర్షం వ్యక్తం చేశారు. ఆయన ఈ మ్యాచ్ చివరిరోజు ఆట కోసం కర్ణాటకలోని హుబ్బళ్లి వచ్చి, స్టేడియంలో ప్రత్యక్షంగా వీక్షించారు.

ఈ విజయాన్ని పురస్కరించుకుని సీఎం ఒమర్ అబ్దుల్లా కీలక ప్రకటన చేశారు. చారిత్రక విజయం సాధించిన జట్టులోని ఆటగాళ్లు, సపోర్ట్ స్టాఫ్‌కు కలిపి మొత్తం రూ. 2 కోట్ల నగదు బహుమతిని ప్రకటించారు. అంతేకాకుండా, ఇటీవల నోటిఫై చేసిన నిబంధనల ప్రకారం.. ప్రతిభావంతులైన క్రీడాకారులకు ప్రభుత్వ ఉద్యోగాలు కల్పిస్తామని హామీ ఇచ్చారు. ఈ విజయం జమ్మూ కశ్మీర్ క్రికెట్‌లో ఒక కీలక మలుపు అని, ఇది ఎంతో మందికి స్ఫూర్తినిస్తుందని సీఎం పేర్కొన్నారు.

మ్యాచ్ విషయానికి వస్తే, పరస్ డోగ్రా నాయకత్వంలోని జమ్మూ కశ్మీర్ జట్టు మొదటి నుంచే పట్టు బిగించింది. తొలి ఇన్నింగ్స్‌లో శుభమ్ పుండిర్ అద్భుత సెంచరీ, ఇతర బ్యాటర్ల సహకారంతో 584 పరుగుల భారీ స్కోరు సాధించింది. అనంతరం బ్యాటింగ్‌కు దిగిన కర్ణాటక తరఫున మయాంక్ అగర్వాల్ (160) ఒంటరి పోరాటం చేసినా, జమ్మూ బౌలర్ ఆకిబ్ నబీ దార్ 5 వికెట్లతో చెలరేగడంతో కర్ణాటక వెనుకబడిపోయింది. దీంతో జమ్మూ కశ్మీర్‌కు 291 పరుగుల భారీ తొలి ఇన్నింగ్స్ ఆధిక్యం లభించింది.

రెండో ఇన్నింగ్స్‌లోనూ కశ్మీర్ ఓపెనర్ కమ్రాన్ ఇక్బాల్, సాహిల్ లోత్రా సెంచరీలు బాదడంతో మ్యాచ్ డ్రాగా ముగిసింది. అయితే, నిబంధనల ప్రకారం మొదటి ఇన్నింగ్స్ ఆధిక్యం ఆధారంగా జమ్మూ కశ్మీర్‌ను విజేతగా ప్రకటించారు. దేశవాళీ క్రికెట్‌లో బలమైన జట్లలో ఒకటైన కర్ణాటకను ఓడించి టైటిల్ గెలవడం కశ్మీర్ జట్టు సత్తాకు నిదర్శనంగా నిలిచింది.