యువత మెచ్చిన స్మార్ట్ ఫోన్ బ్రాండ్ ఇదేనట!

ప్రముఖ స్మార్ట్‌ఫోన్ బ్రాండ్ రియల్‌మీ, భారతీయ యువతలో తన పట్టును మరింత బలోపేతం చేసుకుంటోంది. తాజాగా విడుదలైన 'సీఎంఆర్ కన్స్యూమర్ ఇన్‌సైట్ సర్వే 2026'లో 'యువతలో అత్యంత ప్రజాదరణ పొందిన స్మార్ట్‌ఫోన్ బ్రాండ్'గా రియల్‌మీ నిలిచింది. వినియోగదారుల నుంచి లభిస్తున్న అధిక సంతృప్తి, ప్రత్యేకించి జనరేషన్ జెడ్, మిలీనియల్స్‌లో బలమైన ఆదరణే ఇందుకు కారణమని సర్వే వెల్లడించింది.

దేశంలోని ఎనిమిది ప్రధాన నగరాల్లో నిర్వహించిన ఈ సర్వేలో పలు ఆసక్తికర విషయాలు వెలుగులోకి వచ్చాయి. ప్రస్తుత యువత శక్తివంతమైన పనితీరు, నమ్మకమైన బ్యాటరీ లైఫ్, తమ వ్యక్తిత్వానికి అద్దం పట్టే డిజైన్‌ను కోరుకుంటున్నారని స్పష్టమైంది. కొత్త ఫోన్ కొనుగోలులో కెమెరా క్వాలిటీ (86 శాతం), ఫాస్ట్ ఛార్జింగ్‌తో కూడిన బ్యాటరీ లైఫ్ (79 శాతం) కీలక పాత్ర పోషిస్తున్నాయని తేలింది. సర్వేలో పాల్గొన్న వారిలో 74 శాతం మంది రోజుకు నాలుగు గంటలకు పైగా ఫోన్‌పైనే గడుపుతున్నట్లు తెలిసింది.

వినియోగదారుల సంతృప్తిలో ఇతర బ్రాండ్లతో పోలిస్తే రియల్‌మీ అగ్రస్థానంలో నిలవడంతో పాటు, అత్యధికంగా 81 నెట్ ప్రమోటర్ స్కోర్ (ఎన్పీఎస్) సాధించింది. ఈ ఫలితాలపై రియల్‌మీ ఇండియా చీఫ్ మార్కెటింగ్ ఆఫీసర్ ఫ్రాన్సిస్ వాంగ్ మాట్లాడుతూ.. "సీఎంఆర్ సర్వేలో మా బ్రాండ్‌కు లభించిన గుర్తింపు, యువత మాపై ఉంచిన నమ్మకానికి నిదర్శనం. మా పనితీరు, ఆవిష్కరణలు, కెమెరాపై వారి విశ్వాసాన్ని ఇది ప్రతిబింబిస్తుంది" అని అన్నారు.

స్మార్ట్‌ఫోన్లతో పాటు, టీడబ్ల్యూఎస్ (ట్రూ వైర్‌లెస్ స్టీరియో) విభాగంలో కూడా రియల్‌మీ డిజైన్, బ్యాటరీ లైఫ్ విషయంలో మంచి సంతృప్తిని నమోదు చేస్తున్నట్లు సర్వే పేర్కొంది. డిజైన్, కెమెరా వంటి మెరుగైన ఫీచర్ల కోసం వచ్చే ఏడాదిలోపు కొత్త ఫోన్ కొనుగోలు చేసేందుకు 50 శాతానికి పైగా యువ వినియోగదారులు సిద్ధంగా ఉన్నారని ఈ నివేదిక వెల్లడించింది.