విజయ్ దేవరకొండ-రష్మికలపై శుభాకాంక్షల వర్షం

టాలీవుడ్ స్టార్ కపుల్, ప్రేమ పక్షులు విజయ్ దేవరకొండ, రష్మిక మందన్న వివాహ బంధంతో ఒక్కటయ్యారు. తమ సంప్రదాయ పెళ్లి వేడుకకు సంబంధించిన అందమైన ఫోటోలను ఈ జంట సోషల్ మీడియాలో పంచుకోవడంతో అవి క్షణాల్లో వైరల్ అయ్యాయి. ఈ నవ దంపతులకు పలువురు సినీ పరిశ్రమ ప్రముఖులు శుభాకాంక్షలు తెలుపుతూ పోస్టులు పెడుతున్నారు. వీరి అభినందనలతో సోషల్ మీడియా హోరెత్తిపోతోంది.

రష్మికతో కలిసి 'కాక్‌టెయిల్ 2' సినిమాలో నటిస్తున్న హీరోయిన్ కృతి సనన్, ఈ కొత్త జంటకు ప్రత్యేకంగా, ఎమోషనల్‌గా శుభాకాంక్షలు తెలిపారు. తన ఇన్‌స్టాగ్రామ్ స్టోరీస్‌లో పెళ్లి ఫోటోను పంచుకుంటూ, "ఈ ఫ్రేమ్‌లో ఎంత ప్రేమ, ఆనందం నిండిపోయిందో. మీ ఇద్దరికీ అభినందనలు! మీ జీవితాంతం అందమైన జ్ఞాపకాలతో నిండిపోవాలి. ఒకే సమయంలో ప్రశాంతంగా, ఉత్సాహంగా ఉండే ప్రేమ మీ సొంతం కావాలి" అని ఆమె ఆకాంక్షించారు. మరో పోస్టులో, "రష్మిక.. నీ కోసం చాలా సంతోషంగా ఉంది. ఆనంద భాష్పాలతో కూడిన నీ నవ్వు నన్ను ఎమోషనల్‌గా ఫీల్ అయ్యేలా చేసింది. నేను కలిసిన అత్యంత స్వచ్ఛమైన మనసున్న వ్యక్తులలో నువ్వు ఒకరివి. నువ్వు అన్ని సంతోషాలకు అర్హురాలివి" అని ఆమె రాసుకొచ్చారు.

స్టార్ హీరోయిన్ సమంత రూత్ ప్రభు కూడా తన ఇన్‌స్టాగ్రామ్ స్టోరీస్‌లో విజయ్, రష్మిక పెళ్లి ఫోటోను షేర్ చేసి, "అభినందనలు" అని ట్యాగ్ చేశారు. నటి రకుల్ ప్రీత్ సింగ్ స్పందిస్తూ, "మీ హృదయాలు ఎప్పుడూ కలిసే ఉండాలి. మీ ఇల్లు శాంతి, సంతోషాలతో నిండిపోవాలి. మీ ఇద్దరికీ శుభాకాంక్షలు" అని పోస్ట్ చేశారు.

రష్మికతో కలిసి 'తమ్మ' సినిమాలో నటించిన ఆయుష్మాన్ ఖురానా, "హృదయపూర్వక అభినందనలు" అని కామెంట్ చేశారు. వీరితో పాటు నేహా ధూపియా, ఇషాన్ ఖట్టర్, భూమి పెడ్నేకర్, మౌనీ రాయ్ వంటి పలువురు బాలీవుడ్ ప్రముఖులు కూడా ఈ జంటకు విషెస్ తెలిపారు. విజయ్ దేవరకొండ, రష్మిక మందన్న దంపతుల కొత్త ప్రయాణానికి సినీ పరిశ్రమ నుంచి అభినందనల వెల్లువ కొనసాగుతోంది.