ఇతడే... నా భర్త విజయ్ దేవరకొండ: రష్మిక మందన్న

కొన్నేళ్లుగా సాగుతున్న ప్రేమ ప్రయాణానికి అధికారికంగా ముగింపు పలుకుతూ, సినీ అభిమానులంతా ఎంతో ఆసక్తిగా ఎదురుచూస్తున్న శుభవార్తను నటి రష్మిక మందన్న స్వయంగా ప్రకటించారు. తన ప్రియుడు, స్టార్ హీరో విజయ్ దేవరకొండతో ఏడడుగులు నడిచానని, ఇకపై అతడే తన భర్త అని ప్రపంచానికి పరిచయం చేశారు. తమ సంప్రదాయ వివాహ వేడుకకు సంబంధించిన అందమైన ఫోటోలను ఇన్‌స్టాగ్రామ్ వేదికగా పంచుకుంటూ, విజయ్‌పై తనకున్న ప్రేమను అక్షర రూపంలో ఆవిష్కరించారు. ఈ పోస్ట్ క్షణాల్లోనే సోషల్ మీడియాలో వైరల్‌గా మారింది.

"హాయ్ మై లవ్స్.. ఇప్పుడు మీకు నా భర్తను పరిచయం చేస్తున్నాను! మిస్టర్ విజయ్ దేవరకొండ!!" అంటూ రష్మిక తన సుదీర్ఘ పోస్ట్‌ను ప్రారంభించారు. "నిజమైన ప్రేమంటే ఎలా ఉంటుందో, మనతో మనం ప్రశాంతంగా ఉండటం ఎలాగో నాకు నేర్పించిన వ్యక్తి ఇతడే. పెద్ద కలలు కనడం సరైందేనని, నేను ఊహించిన దానికంటే ఎక్కువే సాధించగలనని ప్రతిరోజూ నాకు గుర్తుచేస్తూ, నిరంతరం ప్రోత్సహించిన వ్యక్తి" అని విజయ్ తన జీవితంలో పోషించిన పాత్రను వివరించారు. 

అతడి గురించి ఓ పుస్తకమే రాయొచ్చని చమత్కరించారు. ఓ మహిళగా నేను ఎలా ఎదగాలని అనుకున్నానో, ఆ విధంగా మారగలిగానంటే అందుకు విజయ్ నే కారణమని స్పష్టం చేశారు. "అందరిముందు డ్యాన్స్ చేయకుండా నన్ను ఎప్పుడూ ఆపలేదు. స్నేహితులతో కలిసి ప్రయాణం చేయడం ఎంత అద్భుతంగా ఉంటుందో చూపించాడు. నేను ఈ రోజు ఇలా ఉన్నానంటే, దాని వెనుక ఉన్నది అతడే. నేను నిజంగా ఆశీర్వదించబడ్డాను" అని పేర్కొన్నారు.

తన జీవితంలోని ప్రతీ ఘట్టానికి ఇప్పుడు ఓ అర్థం వచ్చిందని రష్మిక భావోద్వేగంతో తెలిపారు. "ఇప్పుడు నా విజయాలు, కష్టాలు, సంతోషం, బాధ, ఆనందం.. నా జీవితంలోని ప్రతిదీ మరింత అర్థవంతంగా మారింది. ఎందుకంటే వాటన్నింటికీ సాక్షిగా, అందులో అతిపెద్ద భాగంగా నువ్వు నా పక్కన ఉన్నావు" అని రాసుకొచ్చారు. 

విజయ్‌తో కొత్త జీవితాన్ని ప్రారంభించడంపై తన ఉత్సాహాన్ని దాచుకోలేకపోయారు. "నీ భార్యగా మారడానికి, నీ భార్య అని పిలిపించుకోవడానికి నేను చాలా చాలా చాలా ఎగ్జైటింగ్‌గా ఉన్నాను. ఇక ఫుల్ పార్టీ టైమే!! మనం కలిసి అత్యద్భుతమైన జీవితాన్ని గడుపుదాం! ఐ లవ్ యూ" అంటూ తన పోస్ట్‌ను ప్రేమగా ముగించారు. రష్మిక షేర్ చేసిన ఈ ఫెయిరీ టేల్ వెడ్డింగ్ ఫోటోలు చూసి అభిమానులు, సినీ ప్రముఖులు కొత్త జంటకు శుభాకాంక్షలు తెలుపుతున్నారు.