విజయ్ - రష్మిక పెళ్లి రేపే.. ఈనాటి కార్యక్రమాల వివరాలు ఇవిగో!
దక్షిణాది చిత్ర పరిశ్రమలో ఎప్పుడెప్పుడా అని ఎదురుచూస్తున్న క్షణం రానే వచ్చింది. టాలీవుడ్ సెన్సేషనల్ స్టార్ విజయ్ దేవరకొండ, నేషనల్ క్రష్ రష్మిక మందన్నల వివాహ వేడుకలు రాజస్థాన్లోని ఉదయ్పూర్లో అత్యంత వైభవంగా ప్రారంభమయ్యాయి. ప్రకృతి ఒడిలో, చారిత్రక కట్టడాల మధ్య జరుగుతున్న ఈ వేడుకలకు సంబంధించిన విశేషాలు ఇప్పుడు సోషల్ మీడియాలో వైరల్ అవుతున్నాయి.
విశ్వసనీయ వర్గాల సమాచారం ప్రకారం, ఈ మధ్యాహ్నం 12 గంటల తర్వాత కుటుంబ సభ్యులు, అత్యంత సన్నిహితుల మధ్య 'హల్దీ' (పసుపు) వేడుక అట్టహాసంగా జరగనుంది. ఇక సాయంత్రం 7 నుండి 8 గంటల సమయంలో రంగురంగుల కాంతుల మధ్య 'మెహందీ' వేడుకను ప్లాన్ చేశారు. ఇప్పటికే నిన్న రాత్రి జరిగిన 'సంగీత్' వేడుకలో విజయ్, రష్మిక తమ డ్యాన్స్లతో అతిథులను ఉర్రూతలూగించినట్లు తెలుస్తోంది.
సంప్రదాయబద్ధంగా సాగే వేడుకలకు కాస్త భిన్నంగా, ఈ జంట తమ పెళ్లి వేడుకల్లో సరదా ఆటపాటలకు పెద్దపీట వేశారు. ముఖ్యంగా కుటుంబ సభ్యులు, స్నేహితుల కోసం ప్రత్యేకంగా "విరోష్ ప్రీమియర్ లీగ్" పేరుతో ఒక ప్రైవేట్ క్రికెట్ టోర్నమెంట్ను నిర్వహించారు. ఈ వేడుక కోసం వారిద్దరి పేర్లు, పెళ్లి తేదీ చెక్కిన ఒక చిన్న క్రికెట్ బ్యాట్ను కూడా ప్రత్యేకంగా తయారు చేయించడం విశేషం. దీనికి సంబంధించిన ఫొటోలను రష్మిక తన ఇన్స్టాగ్రామ్ స్టోరీలో పంచుకోవడంతో అభిమానులు ఖుషీ అవుతున్నారు.
ఈ జంట రేపు మూడు ముళ్ల బంధంతో ఒకటి కాబోతోంది. సినీ రంగానికి చెందిన పలువురు ప్రముఖులు ఇప్పటికే ఉదయ్పూర్ చేరుకోగా, రేపు జరగబోయే ప్రధాన వివాహ ఘట్టం కోసం అభిమానులు వేయి కళ్లతో వేచి చూస్తున్నారు. విజయ్, రష్మికల జంటకు సోషల్ మీడియా వేదికగా నెటిజన్లు శుభాకాంక్షలు తెలుపుతున్నారు.
