విజయ్-రష్మిక పెళ్లికి ప్రధాని మోదీ ఆశీస్సులు.. ప్రత్యేక సందేశం!

టాలీవుడ్ అభిమానులు ఎంతో ఆసక్తిగా ఎదురుచూస్తున్న క్రేజీ జంట విజయ్ దేవరకొండ, రష్మిక మందన్న (విరోష్) వివాహ బంధంతో ఒక్కటి కాబోతున్నారు. రేపు (గురువారం) వీరి వివాహ వేడుక జరగనుండగా, ఈ శుభ సందర్భంగా దేశ ప్రధాని నరేంద్ర మోదీ నుంచి ప్రత్యేక శుభాకాంక్షలు అందాయి. విజయ్ దేవరకొండ తల్లిదండ్రులు పంపిన వివాహ ఆహ్వానానికి స్పందించిన ప్రధాని, నూతన వధూవరులకు హృదయపూర్వక అభినందనలు తెలుపుతూ ఒక సందేశం పంపారు.

విజయ్, రష్మిక తమ జీవితంలో ఒక అందమైన కొత్త అధ్యాయాన్ని ప్రారంభిస్తున్నారని ప్రధాని తన సందేశంలో పేర్కొన్నారు. "సప్తపది అనే పవిత్ర బంధంతో ఏడడుగులు వేస్తూ జీవిత భాగస్వాములుగా మారుతున్న మీకు నా శుభాకాంక్షలు. మీ దాంపత్య జీవితం ప్రేమ, కలలు, పరస్పర గౌరవంతో నిండి ఉండాలి. జీవితాంతం స్నేహం, తోడ్పాటు, ఒకరినొకరు అర్థం చేసుకునే గుణంతో ముందుకు సాగాలి" అని ప్రధాని ఆశీర్వదించారు. దేవరకొండ, మందన్న కుటుంబాలకు కూడా ఆయన అభినందనలు తెలిపారు.

రాజస్థాన్‌లోని ఉదయ్‌పూర్‌లో ఉన్న ప్రఖ్యాత మెమంటో ఐటీసీ హోటల్ ఈ రాయల్ వెడ్డింగ్‌కు వేదికగా మారింది. అత్యంత సన్నిహితులు, కుటుంబ సభ్యుల మధ్య ఈ వేడుకను ఘనంగా, ప్రైవేట్‌గా నిర్వహిస్తున్నారు. ఈ వివాహానికి టాలీవుడ్ నుంచి దర్శకులు సందీప్ రెడ్డి వంగా, తరుణ్ భాస్కర్, నటి ఈషా రెబ్బాతో పాటు పలువురు సినీ ప్రముఖులు, కొందరు రాజకీయ నేతలు కూడా హాజరవుతారని సమాచారం.

ఈ వివాహం రెండు విభిన్న సంప్రదాయాల ప్రకారం జరగనుండటం మరో విశేషం. తెలుగు సంప్రదాయంతో పాటు రష్మిక కుటుంబానికి చెందిన కొడ‌వ సంప్ర‌దాయంలో కూడా వివాహ తంతు నిర్వహిస్తారు. ముహూర్తాన్ని అధికారికంగా ప్రకటించనప్పటికీ, ఉదయం వేళల్లోనే ప్రధాన కార్యక్రమాలు జరుగుతాయని తెలుస్తోంది. ప్రధాని మోదీ ఆశీస్సులతో 'విరోష్' వివాహ వేడుకకు మరింత ప్రత్యేకత చేకూరింది. ఈ పెళ్లి ఇప్పుడు దేశవ్యాప్తంగా హాట్ టాపిక్‌గా మారింది.