సూపర్-8లో వెస్టిండీస్ బోణీ... జింబాబ్వేపై భారీ విజయం

టీ20 ప్రపంచకప్‌ సూపర్-8 పోరులో వెస్టిండీస్ అదరగొట్టింది. ముంబైలోని వాంఖడే స్టేడియంలో జరిగిన మ్యాచ్‌లో జింబాబ్వేపై 107 పరుగుల భారీ తేడాతో ఘనవిజయం సాధించింది. తొలుత బ్యాటింగ్‌లో విధ్వంసం సృష్టించి 255 పరుగుల భారీ లక్ష్యాన్ని నిర్దేశించిన విండీస్, ఆ తర్వాత బౌలింగ్‌లోనూ చెలరేగి ప్రత్యర్థిని తక్కువ స్కోరుకే కట్టడి చేసింది. ఈ గెలుపుతో వెస్టిండీస్ తమ గ్రూప్‌లో పటిష్ఠమైన స్థితికి చేరుకుంది.

255 పరుగుల కొండంత లక్ష్య ఛేదనలో బరిలోకి దిగిన జింబాబ్వే ఆరంభం నుంచే తడబడింది. 20 పరుగులకే మూడు కీలక వికెట్లు కోల్పోయి కష్టాల్లో పడింది. ఈ దశలో డియోన్ మయర్స్ (15 బంతుల్లో 28), కెప్టెన్ సికిందర్ రజా (20 బంతుల్లో 27) కాసేపు పోరాడినా, విండీస్ స్పిన్నర్ల ధాటికి నిలవలేకపోయారు. ముఖ్యంగా స్పిన్నర్ గుడాకేశ్ మోతీ తన స్పిన్ మాయాజాలంతో జింబాబ్వే మిడిల్ ఆర్డర్‌ను కుప్పకూల్చాడు. ఒకే ఓవర్లో రెండు వికెట్లు తీసి మ్యాచ్‌ను పూర్తిగా విండీస్ వైపు తిప్పేశాడు. 

చివర్లో బ్రాడ్ ఇవాన్స్ (21 బంతుల్లో 43; 2 ఫోర్లు, 5 సిక్సర్లు) ఒంటరి పోరాటం చేసినా అది ఓటమి అంతరాన్ని తగ్గించడానికే సరిపోయింది. దీంతో జింబాబ్వే 17.4 ఓవర్లలో 147 పరుగులకే ఆలౌట్ అయింది. విండీస్ బౌలర్లలో గుడాకేశ్ మోతీ 4 వికెట్లతో చెలరేగగా, అకీల్ హోసేన్ 3, మాథ్యూ ఫోర్డ్ 2 వికెట్లు పడగొట్టారు.

అంతకుముందు, టాస్ ఓడి బ్యాటింగ్‌కు దిగిన వెస్టిండీస్ ఆరంభం నుంచే దూకుడు ప్రదర్శించింది. షిమ్రాన్ హెట్‌మెయర్ ఆకాశమే హద్దుగా చెలరేగి కేవలం 34 బంతుల్లో 7 ఫోర్లు, 7 సిక్సర్లతో 85 పరుగులు చేసి విధ్వంసం సృష్టించాడు. అతనికి రోవ్‌మన్ పావెల్ (35 బంతుల్లో 59; 4 ఫోర్లు, 4 సిక్సర్లు) తోడవడంతో స్కోరు బోర్డు పరుగులు పెట్టింది. వీరిద్దరూ కలిసి మూడో వికెట్‌కు కేవలం 52 బంతుల్లోనే 122 పరుగుల భాగస్వామ్యం నెలకొల్పి భారీ స్కోరుకు బలమైన పునాది వేశారు. 

ఆ తర్వాత వచ్చిన షెర్ఫాన్ రూథర్‌ఫర్డ్ (13 బంతుల్లో 31), రొమారియో షెపర్డ్ (10 బంతుల్లో 21) కూడా మెరుపులు మెరిపించడంతో విండీస్ నిర్ణీత 20 ఓవర్లలో 6 వికెట్ల నష్టానికి 254 పరుగుల భారీ స్కోరు నమోదు చేసింది. జింబాబ్వే బౌలర్లలో రిచర్డ్ నగరవ, బ్లెస్సింగ్ ముజరబానీ చెరో రెండు వికెట్లు తీశారు.