టీమిండియా-దక్షిణాఫ్రికా సూపర్-8 మ్యాచ్.. టాస్ గెలిచిన సఫారీలు

టీ20 ప్రపంచకప్ 2026లో సూపర్-8 దశలో మరో కీలక సమరానికి రంగం సిద్ధమైంది. అహ్మదాబాద్‌లోని నరేంద్ర మోదీ స్టేడియంలో భారత్‌తో మ్యాచ్‌లో దక్షిణాఫ్రికా కెప్టెన్ ఐడెన్ మార్ క్రమ్ టాస్ గెలిచి బ్యాటింగ్ ఎంచుకున్నాడు. పిచ్ పొడిగా, బ్యాటింగ్‌కు అనుకూలంగా కనిపిస్తోందని, అందుకే ముందుగా బ్యాటింగ్ చేసి భారీ స్కోరు సాధించాలని లక్ష్యంగా పెట్టుకున్నామని మార్ క్రమ్ తెలిపాడు.

మరోవైపు భారత కెప్టెన్ సూర్యకుమార్ యాదవ్ మాట్లాడుతూ.. తాము కూడా బ్యాటింగ్ చేయాలనే అనుకున్నామని, అయితే టాస్ ఓడిపోవడం పట్ల నిరాశ లేదని చెప్పాడు. ఇది టోర్నీలో అత్యంత కీలకమైన దశ అని, అత్యుత్తమ ప్రదర్శన కనబరుస్తామని ధీమా వ్యక్తం చేశాడు. ఈ మ్యాచ్ కోసం భారత జట్టులో ఎలాంటి మార్పులు చేయలేదని సూర్య స్పష్టం చేశాడు. దక్షిణాఫ్రికా జట్టు మాత్రం నాలుగు మార్పులతో బరిలోకి దిగుతోంది.

రెండు జట్ల వివరాలు:
భారత్: అభిషేక్ శర్మ, ఇషాన్ కిషన్ (వికెట్ కీపర్), తిలక్ వర్మ, సూర్యకుమార్ యాదవ్ (కెప్టెన్), హార్దిక్ పాండ్యా, శివమ్ దూబే, రింకూ సింగ్, వాషింగ్టన్ సుందర్, అర్ష్‌దీప్ సింగ్, జస్ప్రీత్ బుమ్రా, వరుణ్ చక్రవర్తి.

దక్షిణాఫ్రికా: ఐడెన్ మార్ క్రమ్ (కెప్టెన్), క్వింటన్ డి కాక్ (వికెట్ కీపర్), ర్యాన్ రికెల్టన్, డివాల్డ్ బ్రెవిస్, డేవిడ్ మిల్లర్, ట్రిస్టన్ స్టబ్స్, మార్కో యాన్సెన్, కార్బిన్ బాష్, కేశవ్ మహారాజ్, కగిసో రబాడ, లుంగి ఎంగిడి.

అహ్మదాబాద్ పిచ్ పూర్తిగా నల్లరేగడి మట్టితో తయారు చేయబడింది. ఇది బ్యాటింగ్‌కు స్వర్గధామంగా పేరొందింది. ఇక్కడ తొలి ఇన్నింగ్స్ సగటు స్కోరు 192గా నమోదైంది. అయితే, రాత్రి సమయంలో మంచు ప్రభావం ఉండే అవకాశం ఉన్నందున, ఛేజింగ్ చేసే జట్టుకు కొంత అనుకూలత లభించవచ్చని విశ్లేషకులు అంచనా వేస్తున్నారు. సూపర్ 8 దశలో ఇరు జట్లకు ఈ మ్యాచ్ అత్యంత కీలకం కావడంతో అభిమానుల్లో తీవ్ర ఉత్కంఠ నెలకొంది.