Mahesh Babu: ‘యుఫోరియా’పై మహేశ్ బాబు ప్రశంసలు... క్లైమాక్స్ అద్భుతమన్న సూపర్ స్టార్

సూపర్‌స్టార్ మహేశ్ బాబు, దర్శకుడు గుణశేఖర్ తెరకెక్కించిన తాజా చిత్రం ‘యుఫోరియా’పై ప్రశంసల వర్షం కురిపించారు. ఈ సినిమాను వీక్షించిన ఆయన, తన అధికారిక ఎక్స్ ఖాతా ద్వారా చిత్ర బృందానికి అభినందనలు తెలిపారు. ప్రస్తుతం ఈ పోస్ట్ సోషల్ మీడియాలో వైరల్ అవుతోంది.

"గుణశేఖర్ గారు కథలను చెప్పే విధానంలో ఒక ప్రత్యేకమైన శైలి ఉంటుంది. సినిమాను నేను బాగా ఆస్వాదించాను, ముఖ్యంగా క్లైమాక్స్ అద్భుతంగా ఉంది. ఇది తప్పక చూడాల్సిన సినిమా" అని మహేశ్ తన పోస్ట్‌లో పేర్కొన్నారు. దర్శకుడు గుణశేఖర్‌తో పాటు నటి భూమికా చావ్లా, నిర్మాతలు నీలిమ గుణ, యుక్త గుణ, సంగీత దర్శకుడు కాల భైరవ, నటి సారా అర్జున్ సహా మొత్తం చిత్ర బృందానికి ఆయన శుభాకాంక్షలు తెలిపారు.

సామాజిక అంశాలతో కూడిన డ్రామా థ్రిల్లర్‌గా ‘యుఫోరియా’ తెరకెక్కింది. యువత ఎదుర్కొంటున్న డ్రగ్స్, నేరాలు, కుటుంబ సమస్యల వంటి సున్నితమైన అంశాలను ఈ చిత్రంలో చర్చించారు. భూమికా చావ్లా, సారా అర్జున్ ప్రధాన పాత్రల్లో నటించిన ఈ చిత్రం ఫిబ్రవరి 6న థియేటర్లలో విడుదలైంది. ప్రేక్షకుల నుంచి సినిమాకు మంచి స్పందన లభిస్తోంది.

మహేశ్ బాబు కెరీర్‌లో మైలురాయిగా నిలిచిన ‘ఒక్కడు’ చిత్రానికి గుణశేఖర్ దర్శకత్వం వహించిన సంగతి తెలిసిందే. వీరిద్దరి మధ్య మంచి స్నేహబంధం ఉంది. ఈ నేపథ్యంలో మహేశ్ నుంచి వచ్చిన ప్రశంసలు ‘యుఫోరియా’ చిత్ర బృందంలో కొత్త ఉత్సాహాన్ని నింపాయి.