మిడిల్ ఓవర్లలో కంగారు పడ్డాం.. అందుకే ఓడాం: యూఎస్ఏ కెప్టెన్ మోనాంక్ పటేల్

టీ20 ప్రపంచకప్‌లో భాగంగా పాకిస్థాన్‌తో జరిగిన మ్యాచ్‌లో తమ ఓటమికి గల కారణాలను అమెరికా (యూఎస్ఏ) కెప్టెన్ మోనాంక్ పటేల్ విశ్లేషించాడు. బ్యాటింగ్, బౌలింగ్ రెండింటిలోనూ మిడిల్ ఓవర్లలో కాస్త కంగారు పడటమే తమ ఓటమికి దారితీసిందని ఆయన అంగీకరించాడు. మంగళవారం కొలంబోలోని సింహళీస్ స్పోర్ట్స్ క్లబ్‌లో జరిగిన ఈ మ్యాచ్‌లో యూఎస్ఏ 32 పరుగుల తేడాతో పాకిస్థాన్ చేతిలో ఓడిపోయింది.

మ్యాచ్ అనంతరం మోనాంక్ పటేల్ మాట్లాడుతూ.. 190 పరుగుల లక్ష్యాన్ని కాపాడుకునే క్రమంలో తమ బౌలర్లు పవర్‌ప్లేలో బాగానే బౌలింగ్ చేసినా, మిడిల్ ఓవర్లలో ఒత్తిడిని కొనసాగించలేకపోయారని తెలిపాడు. "చివరి నాలుగు ఓవర్లలో పేసర్లు పుంజుకున్నారు. దీంతో 190 పరుగులకు కట్టడి చేయగలిగాం. మేం మ్యాచ్‌లోనే ఉన్నామని భావించాం" అని ఆయన వివరించాడు.

అయితే, ఛేదనలోనూ అదే పొరపాటు జరిగిందని మోనాంక్ అన్నాడు. "పవర్‌ప్లేలో బాగా ఆడాం కానీ, మిడిల్ ఓవర్లలో దూకుడు ప్రదర్శించలేకపోయాం. పాకిస్థాన్ స్పిన్నర్లు వేగం తగ్గించి బౌలింగ్ చేయడంతో బౌండరీలు కొట్టడం కష్టమైంది. ఆ సమయంలో మేం కాస్త ఒత్తిడికి గురయ్యాం, అదే మ్యాచ్‌ను మాకు దూరం చేసింది" అని పేర్కొన్నాడు.

గత 12-15 నెలలుగా తమ జట్టు అద్భుతంగా ఆడుతోందని, ఈ మ్యాచ్‌కు కూడా పూర్తి ఆత్మవిశ్వాసంతోనే బరిలోకి దిగామని మోనాంక్ చెప్పాడు. టోర్నీలో మిగిలిన రెండు మ్యాచ్‌లలో గెలిచి ప్రపంచకప్‌ను ఘనంగా ముగించాలనుకుంటున్నట్లు చెప్పాడు. తదుపరి మ్యాచ్ కోసం చెన్నై వెళ్లనున్నామని, అక్కడి పరిస్థితులకు త్వరగా అలవాటుపడి బలంగా పుంజుకుంటామని మోనాంక్ పటేల్ తెలిపాడు.