Rajinikanth: 'విత్ లవ్' టీమ్‌ను అభినందించిన రజనీకాంత్

సూపర్ స్టార్ రజనీకాంత్ తన కుమార్తె సౌందర్య నిర్మించిన 'విత్ లవ్' చిత్ర బృందాన్ని అభినందించారు. ఇటీవల విడుదలై మంచి విజయం సాధించిన సందర్భంగా చిత్ర యూనిట్‌ను ఆయన ప్రత్యేకంగా కలిసి ప్రశంసలు కురిపించారు. ఈ విషయాన్ని సౌందర్య రజనీకాంత్ స్వయంగా సోషల్ మీడియా ద్వారా పంచుకున్నారు. తన తండ్రి చిత్ర బృందంతో సమావేశమైన వీడియోను షేర్ చేస్తూ, "ఇది కేవలం ఒక మీటింగ్ కాదు, ఇదొక ఎమోషన్" అంటూ ఆమె ఆనందం వ్యక్తం చేశారు. ‘విత్ లవ్’ టీమ్‌ను తన తండ్రి అభినందించడం ఒక మరపురాని క్షణమని పేర్కొన్నారు.

మధన్ దర్శకత్వం వహించిన ఈ రొమాంటిక్ కామెడీ చిత్రంలో అభిషన్ జీవింత్, అనస్వర రాజన్ హీరోహీరోయిన్లుగా నటించారు. ఫిబ్రవరి 6న విడుదలైన ఈ సినిమా విమర్శకుల ప్రశంసలతో పాటు బాక్సాఫీస్ వద్ద కూడా మంచి విజయం అందుకుంది. గతంలో ఈ చిత్ర టైటిల్ టీజర్‌ను కూడా రజనీకాంత్ విడుదల చేయడం గమనార్హం. చెన్నై, తిరుచ్చి పరిసర ప్రాంతాల్లో ఈ సినిమా షూటింగ్ జరుపుకుంది.

ఈ సినిమా హీరో అభిషన్ జీవింత్ గతంలో 'టూరిస్ట్ ఫ్యామిలీ' వంటి సూపర్ హిట్ చిత్రానికి దర్శకత్వం వహించారు. శశికుమార్, సిమ్రాన్ నటించిన ఆ చిత్రం బాక్సాఫీస్ వద్ద రూ.90 కోట్లకు పైగా వసూలు చేసింది. అలాంటి విజయవంతమైన దర్శకుడు 'విత్ లవ్' సినిమాతో హీరోగా పరిచయం కావడం విశేషం. ఈ చిత్రానికి ప్రముఖ సంగీత దర్శకుడు షాన్ రోల్డాన్ సంగీతం అందించగా, శ్రేయాస్ కృష్ణ సినిమాటోగ్రఫీ బాధ్యతలు చూసుకున్నారు.