Anishma Anil Kumar: ఇప్పుడు అందరినోటా ఈ అమ్మాయి మాటే!

ఇప్పుడు అందరూ ఒక అమ్మాయిని గురించి అదేపనిగా మాట్లాడుకుంటున్నారు .. చర్చించుకుంటున్నారు. ఆ అమ్మాయి గొప్ప అందగత్తెనా అంటే కాదు. స్టార్ హీరో సరసన సందడి చేసిందా అంటే... అదీ లేదు. మరి ఎందుకు ఆ అమ్మాయిని గురించి అంతా సోషల్ మీడియాలో సెర్చ్ చేస్తున్నారు? ఆ అమ్మాయిని గురించి తెలుసుకోవడానికి ఆసక్తిని కనబరుస్తున్నారు? అనే ఒక సందేహం కలగకుండా ఉండదు. అంతగా అందరిని ఆకట్టుకున్న ఆ అమ్మాయి పేరే అనిష్మా అనిల్ కుమార్.

అనిష్మా తమిళంలో చేసిన 'సిరై' సినిమా రీసెంటుగా ఓటీటీలోకి వచ్చింది. తమిళంలో థియేటర్లవైపు నుంచి కూడా ఈ సినిమా మంచి వసూళ్లనే రాబట్టింది గానీ, తెలుగు ప్రేక్షకులకు ఆ విషయం తెలియదు. ఓటీటీలో తెలుగులోను వచ్చిన ఈ సినిమా చూసిన ప్రేక్షకులు ఆశ్చర్యపోయారు. బలమైన కథాకథనాలతో ఈ సినిమా ఒక రేంజ్ లో ఆడియన్స్ ను ఆకట్టుకుంది. ఒక విలేజ్ నేపథ్యంలో సాగే ఈ ప్రేమకథ, ప్రతి ఒక్కరికీ ఎమోషనల్ గా కనెక్ట్ అవుతుంది.

ఈ సినిమా చూసిన వాళ్లలో చాలామంది అనిష్మా నటనకు ఎక్కువ మార్కులు ఇస్తారు. తాను ప్రేమించిన వ్యక్తి కోసం కుటుంబ సభ్యులను .. మతాన్ని .. ఊరును .. చివరికి విధిని ఎదురించి నిలిచిన పాత్రలో అనిష్మా నటన కన్నీళ్లు పెట్టిస్తుంది. ఈ మధ్య కాలంలో ఈ స్థాయి నటనతో మెప్పించినది ఈ అమ్మాయి మాత్రమేనేమో అనిపిస్తుంది. 2023లో 'పూవన్' అనే మలయాళ సినిమాతో ఎంట్రీ ఇచ్చిన అనిష్మాకి, 'సిరై'తో గట్టి హిట్ పడిందనే చెప్పాలి. తెలుగు నుంచి ఈ అమ్మాయికి మంచి పాత్రలు వెళతాయోమో చూడాలి.