ఎల్లుండి నుంచి టీ20 వరల్డ్ కప్... లైవ్ కవరేజి వివరాలు ఇవిగో!

క్రికెట్ అభిమానులు ఎంతగానో ఎదురుచూస్తున్న ఐసీసీ పురుషుల టీ20 ప్రపంచకప్ 2026 ఎల్లుండి ప్రారంభం కానుంది. ఫిబ్రవరి 7న అట్టహాసంగా మొదలుకానున్న ఈ మెగా టోర్నమెంట్, మార్చి 8న జరిగే ఫైనల్‌తో ముగియనుంది. ఈసారి ప్రపంచకప్ టైటిల్ కోసం మొత్తం 20 జట్లు పోటీ పడుతుండగా, 55 మ్యాచ్‌లు జరగనున్నాయి. డిఫెండింగ్ ఛాంపియన్‌గా బరిలోకి దిగుతున్న టీమిండియా, మూడోసారి కప్ గెలిచి, టైటిల్‌ను నిలబెట్టుకున్న జట్టుగా రికార్డు సృష్టించాలని లక్ష్యంగా పెట్టుకుంది. ప్రపంచవ్యాప్తంగా కోట్ల మంది అభిమానులు ఈ క్రికెట్ సంబరాన్ని వీక్షించేందుకు ఉత్సాహంగా ఎదురుచూస్తున్నారు.

ఈ మెగా టోర్నమెంట్‌లో పాల్గొంటున్న 20 జట్లను ఐదు జట్ల చొప్పున నాలుగు గ్రూపులుగా విభజించారు. ప్రతి గ్రూప్ నుంచి టాప్-2లో నిలిచిన జట్లు సూపర్-8 దశకు అర్హత సాధిస్తాయి.

గ్రూప్-ఎ: భారత్, అమెరికా, నమీబియా, నెదర్లాండ్స్, పాకిస్థాన్
గ్రూప్-బి: ఆస్ట్రేలియా, శ్రీలంక, జింబాబ్వే, ఐర్లాండ్, ఒమన్
గ్రూప్-సి: ఇంగ్లండ్, వెస్టిండీస్, బంగ్లాదేశ్, ఇటలీ, నేపాల్
గ్రూప్-డి: దక్షిణాఫ్రికా, న్యూజిలాండ్, అఫ్గానిస్థాన్, కెనడా, యూఏఈ

ఈసారి టోర్నీకి భారత్, శ్రీలంక సంయుక్తంగా ఆతిథ్యం ఇస్తున్నాయి. మొత్తం 8 వేదికలను ఖరారు చేశారు. అయితే, పాకిస్థాన్ మ్యాచ్‌ల విషయంలో ఐసీసీ కొన్ని ప్రత్యేక నిబంధనలు పెట్టింది. ఒకవేళ పాకిస్థాన్ సెమీ ఫైనల్‌కు అర్హత సాధిస్తే, కోల్‌కతాలో జరగాల్సిన సెమీ ఫైనల్-1ను కొలంబోలోని ఆర్. ప్రేమదాస స్టేడియానికి మారుస్తారు. పాక్ ఫైనల్‌కు చేరినా, అహ్మదాబాద్‌కు బదులుగా కొలంబోలోనే తుదిపోరు నిర్వహిస్తారు. ఒకవేళ సెమీ ఫైనల్‌లో భారత్-పాకిస్థాన్ తలపడితే ఆ మ్యాచ్ కొలంబోలో జరుగుతుంది. పాకిస్థాన్ కాకుండా మరే ఇతర జట్టుతోనైనా భారత్ సెమీ ఫైనల్ ఆడితే, ఆ మ్యాచ్‌కు ముంబై ఆతిథ్యం ఇస్తుంది. 

డిఫెండింగ్ ఛాంపియన్ టీమిండియా తన తొలి మ్యాచ్‌ను ఫిబ్రవరి 7న ముంబైలోని వాంఖడే స్టేడియంలో అమెరికాతో ఆడనుంది. అహ్మదాబాద్, చెన్నై, ఢిల్లీ, ముంబై, కోల్‌కతాతో పాటు శ్రీలంకలోని కొలంబో, క్యాండీ నగరాల్లోని స్టేడియాలు ఈ మ్యాచ్‌లకు వేదికలుగా నిలవనున్నాయి.

భారత్‌లో ఈ టోర్నీ ప్రత్యక్ష ప్రసార హక్కులను స్టార్ స్పోర్ట్స్ నెట్‌వర్క్ దక్కించుకుంది. అభిమానులు తమ అభిమాన మ్యాచ్‌లను స్టార్ స్పోర్ట్స్ ఛానెళ్లలో చూడవచ్చు. డిజిటల్ స్ట్రీమింగ్ హక్కులను జియో హాట్‌స్టార్ సొంతం చేసుకుంది. జియో హాట్‌స్టార్ వెబ్‌సైట్, మొబైల్ యాప్‌లో మ్యాచ్‌లను ప్రత్యక్షంగా వీక్షించవచ్చు. అభిమానుల కోసం ఇంగ్లీష్, హిందీ, తెలుగు, తమిళం, కన్నడ భాషలతో పాటు బెంగాలీ, భోజ్‌పురి, హర్యానవీ భాషల్లోనూ ప్రత్యేక కామెంటరీ ఫీడ్స్ అందుబాటులో ఉంటాయి. 

టీమిండియా ఆడే మ్యాచ్‌లు, సెమీ ఫైనల్స్, ఫైనల్ కోసం మరాఠీ, భారత సంకేత భాష (Indian Sign Language)లలోనూ ప్రసారాలుంటాయి. అంతేకాకుండా, మొబైల్ యూజర్ల కోసం వర్టికల్ లైవ్ ఫీడ్, 360-డిగ్రీ వ్యూ, మల్టీ-క్యామ్ వంటి ఆధునిక ఫీచర్లను కూడా జియో హాట్‌స్టార్ అందిస్తోంది.