ఢిల్లీలో అవార్డు అందుకున్న ఏపీ పోలీసులు.. పనితీరుకు కేంద్రం ప్రశంస
- పాస్పోర్ట్ దరఖాస్తుల వెరిఫికేషన్లో ఏపీ పోలీసులకు జాతీయ అవార్డు
- 2025 సంవత్సరానికి గాను 'ఇన్స్టిట్యూషనల్ పెర్ఫార్మెన్స్' పురస్కారం
- డీజీపీ తరఫున అవార్డును అందుకున్న ఇంటెలిజెన్స్ ఎస్పీ ఎ. రమాదేవి
- పోలీసు శాఖ సమష్టి కృషితోనే ఇది సాధ్యమైందన్న డీజీపీ హరీశ్ కుమార్ గుప్తా
న్యూఢిల్లీలో నిర్వహించిన పాస్పోర్ట్ సేవా దివస్ వేడుకల్లో కేంద్ర విదేశాంగ మంత్రి ఎస్. జైశంకర్ చేతుల మీదుగా ఈ పురస్కారాన్ని ప్రదానం చేశారు. రాష్ట్ర డీజీపీ హరీశ్ కుమార్ గుప్తా తరఫున ఇంటెలిజెన్స్ విభాగం సూపరింటెండెంట్ ఆఫ్ పోలీస్ (ఎస్పీ) ఎ. రమాదేవి ఈ గౌరవప్రదమైన అవార్డును అందుకున్నారు.
ఈ సందర్భంగా డీజీపీ హరీశ్ కుమార్ గుప్తా మాట్లాడుతూ, ముఖ్యమంత్రి నారా చంద్రబాబు నాయుడు నేతృత్వంలో పోలీస్ శాఖ పనితీరు మెరుగుపడిందని తెలిపారు. ఇంటెలిజెన్స్ విభాగం, జిల్లాల ఎస్పీలు, నగర పోలీస్ కమిషనర్ల సమష్టి కృషితోనే ఈ ఘనత సాధ్యమైందని పేర్కొంటూ ఆయన సిబ్బందిని అభినందించారు.
పౌరులకు అత్యంత కీలకమైన పాస్పోర్ట్ జారీ ప్రక్రియలో పోలీస్ వెరిఫికేషన్ను వేగంగా, సమర్థవంతంగా పూర్తి చేయడంలో రాష్ట్ర పోలీస్ శాఖ చూపిన చొరవకు ఈ అవార్డు నిదర్శనంగా నిలుస్తోంది. తద్వారా రాష్ట్రంలో పరిపాలనా సామర్థ్యం మెరుగుపడినట్లు స్పష్టమవుతోంది.
