ముంబైలో ఘోరం.. ప్రొఫెసర్‌ను పొట్టనబెట్టుకున్న చిన్న వివాదం

ముంబై లోకల్ ట్రైన్ లో ఓ దారుణ ఘటన చోటుచేసుకుంది. రైలు దిగే విషయంలో జరిగిన చిన్న వాగ్వాదం ఓ కాలేజీ ప్రొఫెసర్ ప్రాణాలు తీసింది. మలాడ్ రైల్వే స్టేషన్‌లో జరిగిన ఈ ఘటనలో విలే పార్లేలోని ఓ ప్రముఖ కళాశాలలో ప్రొఫెసర్‌గా పనిచేస్తున్న ఆలోక్ సింగ్‌ను ఓ యువకుడు కత్తితో పొడిచి దారుణంగా హత్య చేశాడు. ఈ కేసులో నిందితుడైన 27 ఏళ్ల ఓంకార్ షిండేను గవర్నమెంట్ రైల్వే పోలీసులు (GRP) అరెస్ట్ చేశారు.

పోలీసులు తెలిపిన వివరాల ప్రకారం... ఆలోక్ సింగ్, నిందితుడు ఓంకార్ షిండే ఇద్దరూ ఒకే లోకల్ ట్రైన్‌లో ప్రయాణిస్తున్నారు. రైలు మలాడ్ స్టేషన్‌కు చేరుకోగానే, బోగీ నుంచి కిందకు దిగే విషయంలో వారిద్దరి మధ్య వాగ్వాదం మొదలైంది. ఈ గొడవ ప్లాట్‌ఫామ్‌పైకి వచ్చాక మరింత తీవ్రమైంది. ఆగ్రహంతో ఊగిపోయిన ఓంకార్ షిండే తన వద్ద ఉన్న పదునైన కత్తితో ఆలోక్ సింగ్ కడుపులో ప‌లుమార్లు పొడిచాడు. తీవ్ర రక్తస్రావంతో ఆలోక్ అక్కడికక్కడే కుప్పకూలిపోగా, నిందితుడు జనసమూహంలో కలిసిపోయి పరారయ్యాడు.

వెంటనే రంగంలోకి దిగిన బోరివలి జీఆర్‌పీ పోలీసులు, స్టేషన్‌లోని సీసీటీవీ ఫుటేజీని పరిశీలించారు. తెల్ల చొక్కా, నీలం జీన్స్ ధరించిన ఓ వ్యక్తి ఫుట్ ఓవర్ బ్రిడ్జి మీదుగా పారిపోతున్న దృశ్యాలు కెమెరాల్లో రికార్డయ్యాయి. ఈ ఫుటేజీ, సాంకేతిక ఆధారాలతో నిందితుడిని వసాయ్‌లో గుర్తించి అదుపులోకి తీసుకున్నారు.

చిన్న గొడవకే ఇంత దారుణంగా హత్య చేయడంపై పోలీసులు అనుమానాలు వ్యక్తం చేస్తున్నారు. వారి మధ్య పాత కక్షలు ఏమైనా ఉన్నాయా? లేదా ఇంతటి హింసకు ఇతర కారణాలు ఏమైనా ఉన్నాయా? అనే కోణంలో దర్యాప్తు చేస్తున్నారు. ఆలోక్ సింగ్ మృతదేహాన్ని పోస్టుమార్టం నిమిత్తం ఆసుపత్రికి తరలించారు.