పవర్‌ప్లేలో నా విధ్వంసానికి కారణం అదే.. నా దూకుడైన ఆటకు అత‌నే స్ఫూర్తి: అభిషేక్ శర్మ

టీమిండియా యువ ఓపెనర్ అభిషేక్ శర్మ తన దూకుడైన ఆటతీరు వెనుక ఉన్న స్ఫూర్తి ఎవరో చెప్పాడు. భారత జట్టు మాజీ కెప్టెన్ రోహిత్ శర్మ అడుగుజాడల్లోనే తాను నడుస్తున్నానని, పవర్‌ప్లేలో జట్టుకు మెరుగైన ఆరంభాలు ఇవ్వడమే తన లక్ష్యమని స్పష్టం చేశాడు. ఫిబ్రవరి 7 నుంచి ప్రారంభం కానున్న టీ20 ప్రపంచకప్‌ నేపథ్యంలో తన సన్నద్ధతపై అభిషేక్ మాట్లాడాడు.

"రోహిత్ భాయ్ దేశం కోసం ఎంతో చేశాడు. ముఖ్యంగా పవర్‌ప్లేలో అతను ఇచ్చే ఆరంభాలు అద్భుతం. నేను జట్టులోకి వచ్చినప్పుడు కోచ్, కెప్టెన్ కూడా నా నుంచి అదే ఆశించారు. తొలి బంతి నుంచే దూకుడుగా ఆడటం నా శైలికి సరిగ్గా సరిపోతుంది. అందుకే రోహిత్ అడుగుజాడల్లో నడుస్తూ, జట్టు కోసం రాణించడం సంతోషంగా ఉంది" అని జియోస్టార్‌తో మాట్లాడుతూ అభిషేక్ తెలిపాడు. మొన్న‌ న్యూజిలాండ్‌తో జరిగిన తొలి టీ20లో అభిషేక్ 84 పరుగులు చేసి జట్టు విజయంలో కీలకపాత్ర పోషించిన విష‌యం తెలిసిందే.

ప్రత్యర్థి జట్లలోని బౌలర్లను ఎదుర్కోవడానికి ప్రత్యేకంగా ప్రాక్టీస్ చేస్తానని అభిషేక్ వివరించాడు. "సిరీస్‌కు ముందు సమయం దొరికితే, నేను ఎదుర్కోబోయే బౌలర్లను దృష్టిలో ఉంచుకుని సాధన చేస్తాను. ప్రపంచకప్‌లో బౌలర్లు నాకు అంత సులువుగా పరుగులు ఇవ్వరని తెలుసు. అందుకే దానికి తగ్గట్టుగా సిద్ధమవుతున్నాను" అని పేర్కొన్నాడు. బ్యాటింగ్‌లో మెరుగైన ఫలితాల కోసం తన బ్యాక్‌లిఫ్ట్‌లో చిన్న మార్పు చేసుకున్నానని, దీనివల్ల బంతిని ఎదుర్కోవడం మరింత సులభమైందని అభిషేక్ చెప్పాడు.