నెట్‌ఫ్లిక్స్‌లో ఈ ఏడాది పెద్ద సినిమాల జాతర!

ప్రముఖ ఓటీటీ ప్లాట్‌ఫామ్ నెట్‌ఫ్లిక్స్ 2026లో తెలుగు ప్రేక్షకుల కోసం భారీ వినోదాన్ని సిద్ధం చేసింది. ప్రాంతీయ కంటెంట్‌పై గట్టిగా దృష్టి సారించిన ఈ సంస్థ, ఈ ఏడాది తమ ప్లాట్‌ఫామ్‌లో స్ట్రీమింగ్ కానున్న పలు క్రేజీ తెలుగు సినిమాల జాబితాను శుక్రవారం ప్రకటించింది. థియేటర్లలో విడుదలైన తర్వాత ఈ చిత్రాలు నెట్‌ఫ్లిక్స్‌లో అందుబాటులోకి రానున్నాయి.

ఈ జాబితాలో మెగా పవర్‌స్టార్ రామ్ చరణ్ కథానాయకుడిగా నటిస్తున్న భారీ చిత్రం ‘పెద్ది’ ప్రధాన ఆకర్షణగా నిలిచింది. బుచ్చిబాబు సానా దర్శకత్వంలో రూపుదిద్దుకుంటున్న ఈ చిత్రంలో రామ్ చరణ్ పూర్తి గ్రామీణ, మాస్ అవతార్‌లో కనిపించనున్నారు. జాన్వీ కపూర్ హీరోయిన్‌గా నటిస్తున్న ఈ స్పోర్ట్స్ డ్రామా ప్రస్తుతం చిత్రీకరణ జరుపుకుంటోంది.

ఇది మాత్రమే కాకుండా, పవన్ కల్యాణ్-హరీశ్ శంకర్ కాంబినేషన్‌లో వస్తున్న 'ఉస్తాద్ భగత్ సింగ్', నాని హీరోగా శ్రీకాంత్ ఓదెల తెరకెక్కిస్తున్న 'ది ప్యారడైజ్', వెంకటేశ్-త్రివిక్రమ్ కలయికలో వస్తున్న 'ఆదర్శ కుటుంబం: హౌస్ నెం.47' వంటి చిత్రాలు కూడా ఈ జాబితాలో ఉన్నాయి. వీటితో పాటు దుల్కర్ సల్మాన్ 'ఆకాశంలో ఒక తార', రోషన్ 'ఛాంపియన్', విశ్వక్ సేన్ 'ఫంకీ', శర్వానంద్ 'బైకర్', విజయ్ దేవరకొండ 'వీడీ14' చిత్రాలు కూడా ఉన్నాయి.

ఈ సినిమాలన్నీ తెలుగుతో పాటు హిందీ, తమిళం, కన్నడ, మలయాళ భాషల్లోనూ స్ట్రీమింగ్ కానున్నాయి. అగ్ర తారల సినిమాల హక్కులను దక్కించుకోవడం ద్వారా తెలుగు ఓటీటీ మార్కెట్‌లో తన స్థానాన్ని మరింత పటిష్టం చేసుకోవాలని నెట్‌ఫ్లిక్స్ లక్ష్యంగా పెట్టుకుంది.