డబ్ల్యూపీఎల్: జెయింట్స్ తో మ్యాచ్... టాస్ గెలిచిన ఢిల్లీ క్యాపిటల్స్

మహిళల ప్రీమియర్ లీగ్ (WPL) 2026లో భాగంగా ఆదివారం గుజరాత్ జెయింట్స్‌తో జరుగుతున్న మ్యాచ్‌లో ఢిల్లీ క్యాపిటల్స్ టాస్ గెలిచింది. నవీ ముంబైలోని డీవై పాటిల్ స్టేడియంలో జరుగుతున్న ఈ పోరులో ఢిల్లీ కెప్టెన్ జెమీమా రోడ్రిగ్స్ బౌలింగ్ ఎంచుకుంది. దీంతో గుజరాత్ జెయింట్స్ మొదట బ్యాటింగ్ చేయనుంది. 

ఈ సీజన్‌లో గుజరాత్ జెయింట్స్ యూపీ వారియర్జ్‌పై గెలిచి శుభారంభం చేయగా, ఢిల్లీ క్యాపిటల్స్ డిఫెండింగ్ ఛాంపియన్ ముంబై ఇండియన్స్ చేతిలో ఓటమి పాలైంది. టాస్ గెలిచిన అనంతరం జెమీమా మాట్లాడుతూ, ఇది ఛేజింగ్‌కు అనుకూలించే మైదానమని, మంచు ప్రభావం కూడా ఉండే అవకాశం ఉండటంతోనే ఫీల్డింగ్ ఎంచుకున్నానని వివరించింది. వరుస మ్యాచ్‌ల వల్ల ఓటమిపై ఎక్కువగా ఆలోచించే అవకాశం రాలేదని ఆమె తెలిపింది.

మరోవైపు, గుజరాత్ కెప్టెన్ ఆష్లే గార్డనర్ మాట్లాడుతూ.. తొలి మ్యాచ్ నుంచి తాము చాలా పాఠాలు నేర్చుకున్నామని చెప్పింది. తొలి మ్యాచ్‌లో 44 పరుగులు చేసి జట్టు విజయంలో కీలకపాత్ర పోషించిన యువ క్రీడాకారిణి అనుష్క శర్మను ఆమె ప్రశంసించింది. డబ్ల్యూపీఎల్‌లో అరంగేట్రం చేసిన ఆటగాళ్లు వెంటనే రాణించడం గొప్ప విషయమని గార్డనర్ పేర్కొంది.