కొల్లూరులో రూ.300 కోట్ల భూమి కబ్జాకు యత్నం.. 200 మందితో అర్ధరాత్రి భూ మాఫియా వీరంగం

సంగారెడ్డి జిల్లా కొల్లూరులో అత్యంత విలువైన భూమిని కబ్జా చేసేందుకు భూ మాఫియా చేసిన భారీ ప్రయత్నాన్ని పోలీసులు అడ్డుకున్నారు. కోకాపేట ప్రాంతంలో భూముల ధరలు రికార్డు స్థాయిలో ఎకరానికి రూ. 151 కోట్లు పలుకుతుండటంతో, సమీపంలోని కొల్లూరు భూములపై అక్రమార్కుల కన్ను పడింది. గురువారం రాత్రి సుమారు 200 మంది దుండగులు పక్కా ప్రణాళికతో వచ్చి రూ. 300 కోట్ల విలువైన స్థలాన్ని ఆక్రమించుకునేందుకు ప్రయత్నించారు.

కొల్లూరులోని సర్వే నంబర్ 192లో ఉన్న 5.12 ఎకరాల భూమి వద్దకు రాత్రి 9:30 గంటల సమయంలో చేరుకున్న ముఠా సభ్యులు అర్ధరాత్రి వరకు వీరంగం సృష్టించారు. అక్కడ కాపలాగా ఉన్న సెక్యూరిటీ గార్డులపై దాడి చేసి వారిని బలవంతంగా వాహనంలో ఎక్కించి నార్సింగి వద్ద విడిచిపెట్టారు. అనంతరం రెండు డీసీఎం వ్యాన్లలో తెచ్చిన రేకులు, ఇతర సామగ్రితో కొత్తగా ప్రహారీ నిర్మించేందుకు యత్నించారు. అక్కడే పనిచేస్తున్న దంపతులను ప్రాణాలు తీస్తామని బెదిరించినప్పటికీ వారు భయపడకుండా పోలీసులకు సమాచారం అందించారు.

సమాచారం అందుకున్న పోలీసులు తెల్లవారుజామున ఘటనా స్థలానికి చేరుకుని పరిస్థితిని అదుపులోకి తీసుకున్నారు. 1999లోనే తాను ఈ భూమిని కొనుగోలు చేశానని, దుండగులు ప్రహారీని కూల్చివేసి కబ్జాకు పాల్పడ్డారని బాధితురాలు మాధవి పోలీసులకు ఫిర్యాదు చేశారు. ఈ ఘటనపై కేసు నమోదు చేసినట్లు స్థానిక సీఐ గణేశ్ పటేల్ తెలిపారు. ప్రస్తుతం 26 మంది నిందితులను అదుపులోకి తీసుకున్నామని, ఘటనపై పూర్తిస్థాయి విచారణ చేపడుతున్నామని వివరించారు.