ప్రగతి విజయం ఆమె కష్టానిదే.. క్రెడిట్ తీసుకునే నీచుడిని కాదు: వేణుస్వామి

సినీ నటి ప్రగతి అంతర్జాతీయ వెయిట్ లిఫ్టింగ్ పోటీల్లో సాధించిన పతకాలపై చెలరేగిన వివాదంపై ప్రముఖ జ్యోతిష్యుడు వేణుస్వామి ఘాటుగా స్పందించారు. ఒక మహిళ కష్టపడి సాధించిన విజయానికి క్రెడిట్ తీసుకునేంత నీచుడిని తాను కాదని, ఆ విజయం వంద శాతం ఆమెకే చెందుతుందని ఆయన వ్యాఖ్యానించారు. తన పూజల వల్లే ప్రగతి గెలిచారని తాను ఎప్పుడూ చెప్పలేదని, అలాంటి ప్రచారాన్ని ఆయన ఖండించారు.

ఇటీవల ఓ ఇంటర్వ్యూలో మాట్లాడిన వేణుస్వామి, "ప్రగతి గారు చాలా హార్డ్ వర్కర్. ఆమె మెడల్స్‌లో నాకు ఒక్క శాతం వాటా కూడా లేదు. ఆమె విజయం పూర్తిగా ఆమె కష్టం, దేవుడి అనుగ్రహం వల్లే సాధ్యమైంది" అని స్పష్టం చేశారు. హిందూ మత విశ్వాసాల ప్రచారంలో భాగంగానే తన వద్దకు వచ్చిన వారి ఫొటోలు, వీడియోలు షేర్ చేస్తానని, అంతే తప్ప ఎవరి విజయాలనూ తన ఖాతాలో వేసుకోవాల్సిన అవసరం తనకు లేదని ఆయన చెప్పుకొచ్చారు.

కాగా, 50 ఏళ్ల వయసులో నటి ప్రగతి వెయిట్ లిఫ్టింగ్‌లో అంతర్జాతీయ స్థాయిలో పతకాలు సాధించడం తెలిసిందే. అయితే, ఆమె తన వద్ద పూజలు చేయించుకున్నప్పటి పాత ఫొటోలు, వీడియోలను వేణుస్వామి సోషల్ మీడియాలో పోస్ట్ చేయడంతో వివాదం మొదలైంది. దీనిపై ప్రగతి స్పందిస్తూ, తాను రెండేళ్ల క్రితం మానసికంగా కష్టాల్లో ఉన్నప్పుడు పూజలు చేయించుకున్న మాట వాస్తవమే అయినా, తన విజయానికి కారణం తన కఠోర శ్రమ, శిక్షణేనని స్ప‌ష్టం చేశారు.