Kangana Ranaut: పదేళ్లలో 12 జ్యోతిర్లింగాలు... యాత్ర పూర్తి చేసుకున్న కంగనా రనౌత్

ప్రముఖ నటి, బీజేపీ ఎంపీ కంగనా రనౌత్ తన దశాబ్దకాల ఆధ్యాత్మిక యాత్రను విజయవంతంగా పూర్తి చేసుకున్నారు. దేశవ్యాప్తంగా ఉన్న 12 జ్యోతిర్లింగాల దర్శనాన్ని ఆమె పూర్తి చేశారు. ఇటీవల భీమశంకర జ్యోతిర్లింగాన్ని దర్శించుకోవడంతో ఆమె సంకల్పం నెరవేరింది. ఈ విషయాన్ని ఆమె ఆదివారం సోషల్ మీడియా ద్వారా పంచుకున్నారు.

ఈ సందర్భంగా కంగనా తన సంతోషాన్ని వ్యక్తం చేస్తూ కొన్ని ఫొటోలను పోస్ట్ చేశారు. సంప్రదాయ దుస్తుల్లో శివలింగానికి పాలాభిషేకం చేస్తూ, పూజల్లో పాల్గొన్న చిత్రాలను పంచుకున్నారు. "మహాదేవుడి దయ, నా పూర్వీకుల పుణ్య కర్మల వల్ల ఈరోజు నేను 12 జ్యోతిర్లింగాల దర్శనాన్ని పూర్తి చేశాను. పదేళ్లకు పైగా సాగిన నా యాత్ర భీమశంకర దర్శనంతో ముగిసింది. మొదట్లో ప్రయాణాల్లో యాదృచ్ఛికంగా దర్శనాలు జరిగాయి. కానీ ఇటీవల గట్టి నిర్ణయం తీసుకుని అన్నింటినీ పూర్తి చేయాలనుకున్నాను" అని కంగనా తన పోస్ట్‌లో పేర్కొన్నారు.

భీమశంకర జ్యోతిర్లింగం ప్రత్యేకతను కూడా ఆమె వివరించారు. శివుడు, శక్తి ఇద్దరూ అర్ధనారీశ్వర రూపంలో ఒకే లింగంలో కొలువై ఉండటం ఇక్కడి విశిష్టత అని తెలిపారు. "రోజులో ఎక్కువ భాగం ఈ లింగం వెండి కవచంతో కప్పబడి ఉంటుంది. కేవలం 10 నిమిషాలు మాత్రమే పురాతన లింగాన్ని చూసే అవకాశం దొరుకుతుంది. ఆ సమయంలోనే నేను దర్శనం చేసుకోగలిగాను. హరహర మహాదేవ్" అని ఆమె రాశారు.

కొద్ది రోజుల క్రితం కంగనా గృష్ణేశ్వర్ జ్యోతిర్లింగాన్ని, అంతకుముందు వైద్యనాథ్ జ్యోతిర్లింగాన్ని కూడా దర్శించుకున్నారు. ఇప్పుడు భీమశంకర దర్శనంతో తన ఆధ్యాత్మిక యాత్రను సంపూర్ణం చేసుకున్నారు.