పాక్‌లో 'ధురంధర్' బ్యాన్.. కానీ, బిలావల్ భుట్టో హాజరైన పార్టీలోనూ అదే సినిమా పాట!

పాకిస్థాన్ ప్రభుత్వం నిషేధించిన భారతీయ గూఢచారి థ్రిల్లర్ మూవీ 'ధురంధర్' అక్కడ అనూహ్యమైన ప్రజాదరణ పొందుతోంది. ఈ సినిమా పాక్‌కు వ్యతిరేకంగా ఉందంటూ కొందరు రాజకీయ నాయకులు కేసులు పెడుతుండగా, అందులోని 'FA9LA' అనే పాట మాత్రం దేశవ్యాప్తంగా పార్టీలలో మారుమోగిపోతోంది. తాజాగా, ఈ పాటకు సంబంధించిన ఓ వీడియో సోషల్ మీడియాలో వైరల్‌గా మారింది.

పాకిస్థాన్ పీపుల్స్ పార్టీ (పీపీపీ) అధినేత బిలావల్ భుట్టో హాజరైన ఓ పార్టీలో 'ధురంధర్' సినిమాలోని 'ఫస్లా' పాటను ప్లే చేశారు. వీడియోలో, బిలావల్ వేదికపైకి వచ్చి కూర్చుంటుండగా నేపథ్యంలో ఈ పాట వినిపించింది. బహ్రెయిన్ కళాకారుడు నవాఫ్ ఫహద్ ఆలపించిన ఈ పాట, సినిమాలో అక్షయ్ ఖన్నా పోషించిన రెహ్మాన్ అనే డాన్ పాత్రతో ముడిపడి ఉంది.

విచిత్రం ఏమిటంటే, ఈ సినిమాలో తమ నాయకురాలు బెనజీర్ భుట్టో చిత్రాలను ఉపయోగించడాన్ని వ్యతిరేకిస్తూ బిలావల్ భుట్టోకు చెందిన పీపీపీ పార్టీనే కరాచీ కోర్టులో కేసు దాఖలు చేసింది. సినిమా నటీనటులు, సిబ్బందిపై ఎఫ్‌ఐఆర్ నమోదు చేయాలని పిటిషన్‌లో కోరింది.

1999 నాటి కాందహార్ హైజాక్, 26/11 ముంబై దాడులు, ల్యారీ గ్యాంగ్ వార్స్ వంటి అంశాలతో తెరకెక్కిన ఈ చిత్రంపై పాకిస్థాన్‌తో పాటు కొన్ని గల్ఫ్ దేశాలు నిషేధం విధించాయి. అయినప్పటికీ, డిజిటల్ స్పేస్‌పై పాక్ నిఘా సంస్థ ఐఎస్ఐ పట్టు కోల్పోవడంతో పైరసీని అడ్డుకోలేకపోయింది. కేవలం రెండు వారాల్లోనే పాక్‌లో ఈ సినిమాను 20 లక్షల మందికి పైగా అక్రమంగా డౌన్‌లోడ్ చేసుకున్నారు. దీంతో అక్కడ అత్యధికంగా పైరసీకి గురైన చిత్రంగా 'ధురంధర్' నిలిచింది. ఈ సినిమా ద్వారా తమ దేశాన్ని ఉగ్రవాద దేశంగా చిత్రీకరించారని పాకిస్థానీలు ఆరోపిస్తున్నారు.