టొరంటోలో మంత్రి లోకేశ్ వరుస భేటీలు... ఏపీకి పెట్టుబడుల కోసం చర్చలు

ఆంధ్రప్రదేశ్‌కు పెట్టుబడులను ఆకర్షించే లక్ష్యంతో రాష్ట్ర ఐటీ, విద్యాశాఖ మంత్రి నారా లోకేశ్ కెనడాలో పర్యటిస్తున్నారు. టొరంటోలో ఆయన పలు ప్రముఖ సంస్థల ప్రతినిధులు, వాణిజ్యవేత్తలతో వరుస సమావేశాలు నిర్వహిస్తున్నారు. ఆర్టిఫిషియల్ ఇంటెలిజెన్స్ (ఏఐ), క్వాంటమ్ కంప్యూటింగ్, క్లీన్ ఎనర్జీ వంటి భవిష్యత్ సాంకేతిక రంగాల్లో ఏపీలో పెట్టుబడులు పెట్టాలని ఆహ్వానిస్తున్నారు.

ఈ పర్యటనలో భాగంగా ప్రముఖ ఎంటర్‌ప్రైజ్ ఇన్ఫర్మేషన్ మేనేజ్‌మెంట్ సంస్థ ఓపెన్‌టెక్స్ట్ సీనియర్ వైస్ ప్రెసిడెంట్ జాన్ రాడ్కోతో లోకేశ్ భేటీ అయ్యారు. ఏపీలో నైపుణ్యాభివృద్ధి, ఇంటర్న్‌షిప్ కార్యక్రమాలను ప్రారంభించాలని కోరారు. దీనిపై స్పందించిన జాన్ రాడ్కో, తమ కార్యకలాపాలను టైర్-2 నగరాలకు విస్తరించాలని చూస్తున్నామని, ఏపీ ప్రభుత్వ ప్రతిపాదనలను పరిశీలిస్తామని హామీ ఇచ్చారు.

అనంతరం టొరంటోలోని భారత కాన్సులేట్ జనరల్ కపిధ్వజ ప్రతాప్ సింగ్, కెనడా-ఇండియా బిజినెస్ కౌన్సిల్ (సీఐబీసీ) అధ్యక్షుడు విక్టర్ థామస్‌తో మంత్రి వేర్వేరుగా సమావేశమయ్యారు. ముఖ్యమంత్రి చంద్రబాబు నాయుడు నాయకత్వంలో ఏపీ వేగంగా అభివృద్ధి చెందుతోందని, సింగిల్ విండో విధానంలో కేవలం 21 రోజుల్లోనే పరిశ్రమలకు అనుమతులు ఇస్తున్నామని వివరించారు. విశాఖలో గూగుల్ భారీ పెట్టుబడి వంటి ఉదాహరణలను ప్రస్తావిస్తూ, ఏపీలో పెట్టుబడిదారులకు అత్యుత్తమ ప్రోత్సాహకాలు అందిస్తున్నామని తెలిపారు.
     
ఇరుదేశాల మధ్య వాణిజ్యం బలోపేతం అవుతోందని, ఏపీలో పారిశ్రామికాభివృద్ధికి తమ వంతు సహకారం అందిస్తామని కెనడా ప్రతినిధులు పేర్కొన్నారు. భారత్‌లో ముఖ్యంగా ఏపీలో ఉన్న అవకాశాలను కెనడియన్ పారిశ్రామికవేత్తలకు వివరిస్తామని వారు హామీ ఇచ్చారు.