ప్రేమలో మోసంపై ఇంద్రజ ఫైర్.. అలా చేస్తే సర్వనాశనమేనంటూ ఘాటు వ్యాఖ్యలు

ఒకప్పుడు స్టార్ హీరోయిన్‌గా వెలుగొంది, ప్రస్తుతం బుల్లితెరపై జడ్జిగా తన సెకండ్ ఇన్నింగ్స్‌లోనూ ప్రేక్షకుల ఆదరణ పొందుతున్న సీనియర్ నటి ఇంద్రజ ప్రేమ, బ్రేకప్‌లపై సంచలన వ్యాఖ్యలు చేశారు. ప్రేమ పేరుతో మోసం చేసేవారికి పుట్టగతులు ఉండవని, వారు సర్వనాశనం అయిపోతారని ఆమె తీవ్రంగా హెచ్చరించారు. ప్రస్తుతం ఈ వ్యాఖ్యలకు సంబంధించిన వీడియో ప్రోమో సోషల్ మీడియాలో వైరల్‌గా మారింది.

ఇంద్రజ తాజాగా ఓ టాక్ షోలో పాల్గొన్నారు. ఇందులో భాగంగా, ఈ తరం యువత ప్రేమ, బ్రేకప్‌లను తేలికగా తీసుకుంటున్నారని, దీనిపై మీ అభిప్రాయం ఏంటని యాంకర్ ఆమెను ప్రశ్నించారు. దీనికి ఇంద్రజ తనదైన శైలిలో స్పందిస్తూ, "ఒక బిడ్డకు జన్మనిచ్చేటప్పుడు కలిగే ప్రసవ వేదన ఎంత తీవ్రంగా ఉంటుందో, ప్రేమలో మోసపోతే కలిగే బాధ కూడా అంతే స్థాయిలో ఉంటుంది. అలా మోసం చేసింది ఆడైనా, మగైనా సరే.. వాళ్లకు పుట్టగతులు ఉండవు. సర్వనాశనం అయిపోతారు. ఎవరైనా పుట్టింది ప్రేమించడానికి కాదు, సాధించడానికి" అని ఘాటుగా వ్యాఖ్యానించారు.

'జబర్దస్త్' షో ద్వారా బుల్లితెరపైకి రీఎంట్రీ ఇచ్చిన ఇంద్రజ, తన హుందా అయిన ప్రవర్తన, మాటతీరుతో 'ఇంద్రజమ్మ'గా ప్రత్యేక గుర్తింపు తెచ్చుకున్నారు. ప్రస్తుతం 'శ్రీదేవి డ్రామా కంపెనీ' వంటి షోలకు జడ్జిగా వ్యవహరిస్తూ సినిమాల్లోనూ నటిస్తున్నారు.