ఫ్యాన్సీ నంబర్‌ ప్లేట్‌కు రూ.1.17 కోట్లు.. కట్టకపోవడంతో ఆస్తులపై విచారణ

హరియాణాలో ఓ ఫ్యాన్సీ నంబర్ ప్లేట్‌ను ఏకంగా రూ. 1.17 కోట్లకు వేలంలో దక్కించుకున్న ఓ వ్యక్తి, ఆ మొత్తాన్ని చెల్లించడంలో విఫలమవడంతో ఇప్పుడు చిక్కుల్లో పడ్డారు. ఈ ఘటనను తీవ్రంగా పరిగణించిన హరియాణా ప్రభుత్వం, సదరు వ్యక్తి ఆస్తులపై విచారణకు ఆదేశించింది. ఈ చర్య, వేలంలో బాధ్యతారాహిత్యంగా పాల్గొనే వారికి ఒక హెచ్చరికగా నిలుస్తోంది.

వివరాల్లోకి వెళ్తే, రోములస్ సొల్యూషన్స్ ప్రైవేట్ లిమిటెడ్ డైరెక్టర్ అయిన సుధీర్ కుమార్, 'HR88B8888' అనే వీఐపీ నంబర్‌ను నవంబర్ 26న జరిగిన ఆన్‌లైన్ వేలంలో రికార్డు ధరకు దక్కించుకున్నారు. అయితే, డిసెంబర్ 1 గడువులోగా ఆయన డబ్బు చెల్లించలేదు. దీంతో అతని రూ. 11,000 సెక్యూరిటీ డిపాజిట్‌ను జప్తు చేసినట్లు హరియాణా రవాణా శాఖ మంత్రి అనిల్ విజ్ తెలిపారు.

ఈ విషయంపై మంత్రి అనిల్ విజ్ మాట్లాడుతూ, "సుధీర్ కుమార్ ఆస్తులు, ఆదాయంపై పూర్తిస్థాయిలో దర్యాప్తు చేయాలని మా శాఖను ఆదేశించాను. అసలు అతనికి రూ. 1.17 కోట్లు చెల్లించే ఆర్థిక స్తోమత ఉందో లేదో తేలుస్తాం. అవసరమైతే ఆదాయపు పన్ను శాఖకు కూడా లేఖ రాస్తాం. వేలం అనేది సరదా కాదు, అదొక బాధ్యత" అని స్పష్టం చేశారు. భవిష్యత్తులో ఇలాంటి ఘటనలు పునరావృతం కాకుండా ఉండేందుకే ఈ కఠిన చర్యలు తీసుకుంటున్నట్లు ఆయన వివరించారు.

మరోవైపు, సుధీర్ కుమార్ వాదన మరోలా ఉంది. టెక్నికల్ సమస్యల వల్ల రెండుసార్లు డబ్బు డిపాజిట్ చేయడంలో విఫలమయ్యానని తెలిపారు. అంతేకాకుండా, ఒక నంబర్ ప్లేట్ కోసం ఇంత పెద్ద మొత్తం ఖర్చు చేయడానికి తన కుటుంబ సభ్యులు అంగీకరించడం లేదని, వారితో చర్చిస్తున్నానని పేర్కొన్నారు.

ప్రస్తుతానికి ఈ నంబర్ ప్లేట్‌ను మళ్లీ వేలానికి ఉంచనున్నట్లు అధికారులు ప్రకటించారు. 'B' అక్షరం కూడా '8' అంకెలా కనిపించడంతో ఈ నంబర్ ప్లేట్‌కు ఇంతటి క్రేజ్ ఏర్పడింది.