కోచ్ గంభీర్‌పై అభిమానుల ఫైర్... ‘కోచింగ్ వదిలెయ్’ అంటూ నినాదాలు.. వీడియో ఇదిగో!

టీమిండియా హెడ్ కోచ్ గౌతమ్ గంభీర్‌కు అభిమానుల నుంచి తీవ్ర వ్యతిరేకత ఎదురవుతోంది. దక్షిణాఫ్రికాతో స్వదేశంలో జరిగిన టెస్ట్ సిరీస్‌లో భారత్ ఘోరంగా ఓడిపోయిన నేపథ్యంలో శుక్రవారం రాంచీలో జరిగిన ప్రాక్టీస్ సెషన్‌లో ఓ అభిమాని గంభీర్‌ను ఉద్దేశించి ఆగ్రహం వ్యక్తం చేశాడు. ఈ ఘటనకు సంబంధించిన వీడియో సోషల్ మీడియాలో వైరల్ అవుతోంది.

కోచింగ్ వదిలేయాలని, సొంతగడ్డపై దక్షిణాఫ్రికాతో గెలవలేకపోతే 2027 వరల్డ్ కప్ గురించి మర్చిపోవాలంటూ ఆ అభిమాని హిందీలో గట్టిగా అరిచాడు. ఈ సిరీస్‌లో 0-2 తేడాతో వైట్‌వాష్‌కు గురైన టీమిండియా ప్రదర్శనపై మాజీ క్రికెటర్లు, క్రీడా నిపుణుల నుంచి కూడా గంభీర్‌పై తీవ్ర విమర్శలు వస్తున్నాయి. అతడిని కోచ్ పదవి నుంచి, ముఖ్యంగా టెస్టు ఫార్మాట్‌లో తొలగించాలనే డిమాండ్లు వినిపిస్తున్నాయి.

గంభీర్ జూలై 2024లో కోచ్‌గా బాధ్యతలు స్వీకరించినప్పటి నుంచి భారత జట్టు స్వదేశంలో ఆడిన 9 టెస్టుల్లో 5 మ్యాచ్‌లలో ఓటమి పాలైంది. రెండుసార్లు సొంతగడ్డపై వైట్‌వాష్‌కు గురైంది. ఇటీవల దక్షిణాఫ్రికాతో జరిగిన సిరీస్‌లో కోల్‌కతా టెస్టులో 30 పరుగుల తేడాతో ఓడిన భారత్, గౌహతిలో జరిగిన రెండో టెస్టులో ఏకంగా 408 పరుగుల భారీ తేడాతో ఓటమిని చవిచూసింది. పరుగుల పరంగా భారత టెస్ట్ క్రికెట్ చరిత్రలోనే ఇది అతిపెద్ద ఓటమి కావడం గమనార్హం.

ఈ నేపథ్యంలో భారత జట్టు దక్షిణాఫ్రికాతో మూడు వన్డేల సిరీస్‌కు సిద్ధమవుతోంది. నవంబర్ 30న రాంచీలో తొలి వన్డే జరగనుంది. ఈ సిరీస్‌కు రెగ్యులర్ కెప్టెన్ శుభ్‌మన్ గిల్, వైస్ కెప్టెన్ శ్రేయస్ అయ్యర్ గాయాల కారణంగా దూరమవడంతో కేఎల్ రాహుల్‌కు కెప్టెన్సీ బాధ్యతలు అప్పగించారు. వీరి స్థానాల్లో రుతురాజ్ గైక్వాడ్, రవీంద్ర జడేజా, తిలక్ వర్మ, రిషభ్ పంత్ తిరిగి జట్టులోకి వచ్చారు. గిల్ స్థానంలో యశస్వి జైస్వాల్ ఓపెనర్‌గా బరిలోకి దిగే అవకాశం ఉంది.