అంచనాలను మించి దూసుకెళ్లిన భారత ఆర్థిక వ్యవస్థ

భారత ఆర్థిక వ్యవస్థ అంచనాలను మించి అద్భుతమైన పనితీరు కనబరిచింది. 2025-26 ఆర్థిక సంవత్సరం రెండో త్రైమాసికంలో (జులై-సెప్టెంబర్) స్థూల దేశీయోత్పత్తి (జీడీపీ) వృద్ధి రేటు 8.2 శాతంగా నమోదైంది. గడిచిన ఆరు త్రైమాసికాల్లో ఇదే అత్యధిక వృద్ధి కావడం గమనార్హం. వస్తు తయారీ, సేవల రంగాలు బలమైన పనితీరు కనబరచడం ఈ వృద్ధికి ప్రధాన కారణంగా నిలిచింది.

ఈ ఆర్థిక సంవత్సరం తొలి త్రైమాసికంలో వృద్ధి 7.8 శాతంగా ఉండగా, గత ఏడాది ఇదే కాలంలో ఇది కేవలం 5.6 శాతంగా నమోదైంది. ఈ గణాంకాలతో ప్రపంచంలోనే అత్యంత వేగంగా అభివృద్ధి చెందుతున్న ప్రధాన ఆర్థిక వ్యవస్థగా భారత్ తన స్థానాన్ని మరింత పదిలం చేసుకుంది. ఇదే త్రైమాసికంలో చైనా వృద్ధి రేటు కేవలం 4.8 శాతానికే పరిమితమైంది.

శుక్రవారం జాతీయ గణాంకాల కార్యాలయం (ఎన్ఎస్‌వో) విడుదల చేసిన డేటా ప్రకారం ఈ ఆర్థిక సంవత్సరం ప్రథమార్ధంలో (ఏప్రిల్-సెప్టెంబర్) వృద్ధి రేటు 8 శాతంగా నమోదైంది. ఇదే జోరు కొనసాగితే పూర్తి ఆర్థిక సంవత్సరానికి వృద్ధి రేటు 7 శాతం దాటవచ్చని నిపుణులు అంచనా వేస్తున్నారు. ఈ ఆర్థిక సంవత్సరంలోనే భారత ఆర్థిక వ్యవస్థ పరిమాణం 4 ట్రిలియన్ డాలర్ల మార్కును దాటవచ్చని ప్రధాన ఆర్థిక సలహాదారు వి.అనంత నాగేశ్వరన్ ధీమా వ్యక్తం చేశారు.

ఈ గణాంకాలపై ప్రధాని నరేంద్ర మోదీ హర్షం వ్యక్తం చేశారు. ప్రభుత్వ విధానాలు, సంస్కరణల వల్లే ఈ సానుకూల ఫలితాలు వస్తున్నాయని ఆయన అన్నారు. దేశ ప్రజల కృషి, వ్యాపార దక్షతకు ఇది నిదర్శనమని, సంస్కరణల బాటలో ముందుకు వెళ్తామని ఆయన స్పష్టం చేశారు. ఈ వృద్ధి రేటు బలమైన ఆర్థిక వ్యవస్థకు నిదర్శనమని కేంద్ర ఆర్థిక మంత్రి నిర్మలా సీతారామన్ పేర్కొన్నారు.