భారత్‌తో మరోసారి కయ్యం.. వివాదాస్పద మ్యాప్‌తో నేపాల్ కొత్త కరెన్సీ

భారత్‌తో సరిహద్దు వివాదాన్ని నేపాల్ మరోసారి పెద్దది చేస్తోంది. భారత్‌కు చెందిన లిపులేఖ్, లింపియాధుర, కాలాపానీ ప్రాంతాలను తమ భూభాగాలుగా చూపుతూ రూపొందించిన వివాదాస్పద మ్యాప్‌తో కూడిన కొత్త 100 రూపాయల కరెన్సీ నోటును అధికారికంగా విడుదల చేసింది. ఈ చర్య ఇరు దేశాల మధ్య సంబంధాలను మరింత ఉద్రిక్తంగా మార్చింది.

నేపాల్ తీసుకున్న ఈ నిర్ణయంపై భారత ప్రభుత్వం తీవ్రంగా స్పందించింది. ఇలాంటి ఏకపక్ష చర్యల వల్ల క్షేత్రస్థాయి వాస్తవాలు మారిపోవని భారత విదేశాంగ మంత్రి స్పష్టం చేశారు. సరిహద్దు సమస్యపై ఇరు దేశాల మధ్య చర్చలు జరుగుతున్నాయని, ఈ సమయంలో ఇలాంటి చర్యలకు పాల్పడటం సరికాదని పేర్కొంది.

గతంలోనే నేపాల్ ఈ మ్యాప్‌ను ఆమోదించినప్పుడు భారత్ హెచ్చరికలు జారీ చేసింది. కృత్రిమంగా భూభాగాలను విస్తరించుకునే ప్రయత్నాలను అంగీకరించబోమని తేల్చిచెప్పింది. అయినప్పటికీ, ఈ ఏడాది మే నెలలో నేపాల్ కేబినెట్ ఈ కొత్త నోటు ముద్రణకు ఆమోదం తెలిపింది. తాజాగా దానిని చలామణిలోకి తీసుకురావడంతో సరిహద్దు వివాదం మళ్లీ తెరపైకి వచ్చింది.