బంగారం, వెండి ధరల జోరు... ఒక్కరోజే భారీగా పెరుగుదల!

బుధవారం నాడు దేశీయ మార్కెట్లో బంగారం, వెండి ధరలు భారీగా పెరిగాయి. అంతర్జాతీయ మార్కెట్లలో బలమైన సానుకూల సంకేతాల నేపథ్యంలో పసిడి, వెండి ధరలకు రెక్కలొచ్చాయి. ముఖ్యంగా వెండి ధర ఒక్కరోజే కిలోకు రూ. 2,700కు పైగా పెరగడం గమనార్హం.

ఇండియా బులియన్ జ్యువెలర్స్ అసోసియేషన్ (IBJA) ప్రకారం, 10 గ్రాముల 24 క్యారెట్ల బంగారం ధర రూ. 962 పెరిగి రూ. 1,26,081కి చేరింది. మంగళవారం దీని ధర రూ. 1,25,119గా ఉంది. ఇదే సమయంలో 22 క్యారెట్ల బంగారం ధర రూ. 1,15,490కి, 18 క్యారెట్ల బంగారం ధర రూ. 94,561కి పెరిగింది.

బంగారం కంటే వెండి ధర మరింత వేగంగా పెరిగింది. గత 24 గంటల్లో కిలో వెండి ధర రూ. 2,705 ఎగబాకి రూ. 1,59,025 వద్ద స్థిరపడింది. ఫ్యూచర్స్ మార్కెట్లోనూ ఇదే ట్రెండ్ కనిపించింది. మల్టీ కమోడిటీ ఎక్స్ఛేంజ్ (MCX)లో డిసెంబర్ 5 డెలివరీ బంగారం 0.61 శాతం లాభంతో రూ. 1,25,988 వద్ద ట్రేడ్ అయింది. వెండి ఫ్యూచర్స్ 1.56 శాతం పెరిగి రూ. 1,58,757 వద్ద నిలిచింది.

అంతర్జాతీయ మార్కెట్లోనూ ధరలు పెరిగాయి. ఔన్సు బంగారం 0.77 శాతం పెరిగి 4,198 డాలర్లకు, వెండి 1.60 శాతం పెరిగి 51.80 డాలర్లకు చేరింది. 

ఎల్‌కేపీ సెక్యూరిటీస్‌కు చెందిన జతిన్ త్రివేది మాట్లాడుతూ, "బంగారంలో బుల్లిష్ ట్రెండ్ కొనసాగుతోంది. మార్కెట్ దృష్టి ఇప్పుడు అమెరికా జీడీపీ, కోర్ పీసీఈ ధరల సూచీ వంటి కీలక ఆర్థిక డేటాపై ఉంది. రాబోయే ఫెడరల్ రిజర్వ్ వడ్డీ రేట్ల నిర్ణయం బంగారం గమనాన్ని నిర్దేశిస్తుంది. స్వల్పకాలంలో బంగారం ధర రూ. 1,24,000 నుంచి రూ. 1,27,500 మధ్యలో కదలాడవచ్చు" అని విశ్లేషించారు.