వలస కూలీల పిల్లల చదువుకు ప్రభుత్వం భరోసా.. ఏపీలో 236 సీజనల్ హాస్టళ్లు

పొట్టకూటి కోసం తల్లిదండ్రులు వలస వెళితే, వారి పిల్లల చదువు మధ్యలోనే ఆగిపోకూడదన్న లక్ష్యంతో ఆంధ్రప్రదేశ్ ప్రభుత్వం కీలక చర్యలు చేపట్టింది. రాష్ట్రవ్యాప్తంగా వలస కుటుంబాల పిల్లల కోసం ఈ ఏడాది 236 సీజనల్ హాస్టళ్లను ఏర్పాటు చేసింది. ఈ హాస్టళ్ల ద్వారా కేవలం రాష్ట్రంలోని పిల్లలకే కాకుండా ఇతర రాష్ట్రాల నుంచి పనుల కోసం వలస వచ్చిన కార్మికుల పిల్లలకు కూడా వారి మాతృభాషలోనే విద్యను అందించే వినూత్న కార్యక్రమానికి శ్రీకారం చుట్టింది.

రాష్ట్రంలో దాదాపు 11,842 మంది వలస కార్మికుల పిల్లలు ఉన్నారని సమగ్ర శిక్ష అధికారులు అంచనా వేశారు. వీరి కోసం ఏర్పాటు చేసిన హాస్టళ్ల నిర్వహణకు కేంద్ర ప్రభుత్వం 60 శాతం నిధులు సమకూరుస్తోంది. ఈ ఏడాదికి గాను మొత్తం రూ.11.63 కోట్లు కేటాయించారు. స్వచ్ఛంద సేవా సంస్థలు, స్వయం సహాయక బృందాల ఆధ్వర్యంలో నడిచే ఈ హాస్టళ్లలో ఒక్కో విద్యార్థికి భోజనం కోసం నెలకు రూ.1000 చొప్పున ఖర్చు చేస్తున్నారు. ప్రతి హాస్టల్‌లో వంట మనిషి, హెల్పర్, టీచర్, కేర్‌ టేకర్‌ను నియమించారు.

ఈ పథకం ముఖ్యంగా గుంటూరు జిల్లాలో విజయవంతంగా అమలవుతోంది. అక్కడి మిర్చి యార్డుల్లో పనిచేసేందుకు బీహార్, ఝార్ఖండ్, ఛత్తీస్‌గఢ్‌ల నుంచి వలస వచ్చిన కూలీల పిల్లల కోసం యార్డుల సమీపంలోనే హాస్టళ్లు ఏర్పాటు చేశారు. దీంతో ఒక్క గుంటూరు జిల్లాలోనే 1,875 మంది బీహార్‌కు చెందిన విద్యార్థులు చదువుకుంటున్నారు. కర్నూలులో 4,020, కృష్ణాలో 1,821, ఎన్టీఆర్ జిల్లాలో 1,723 మంది విద్యార్థులు ఈ హాస్టళ్లలో ఉంటూ విద్యను కొనసాగిస్తున్నారు.

ఈ విధానంపై సమగ్రశిక్ష స్టేట్ ప్రాజెక్ట్ డైరెక్టర్ బి. శ్రీనివాసరావు మాట్లాడుతూ, "ఇతర రాష్ట్రాల విద్యార్థులకు వారి మాతృభాష తెలిసిన స్థానికులను వలంటీర్లుగా నియమించి బోధన అందిస్తున్నాం. దీనివల్ల పదేళ్లు దాటిన పిల్లలు కూడా కూలి పనులకు వెళ్లకుండా తరగతులకు హాజరవుతున్నారు" అని వివరించారు. ఈ హాస్టళ్లను నిరంతరం పర్యవేక్షిస్తున్నట్లు అధికారులు తెలిపారు.