హైడ్రాపై హైకోర్టు కీలక వ్యాఖ్యలు

హైదరాబాద్ మెట్రోపాలిటన్ డెవలప్‌మెంట్ అథారిటీ (హైడ్రా) కమిషనర్ ఎ.వి. రంగనాథ్‌కు హైకోర్టు తీవ్ర స్థాయిలో హెచ్చరికలు జారీ చేసింది. మీకు అధికారం ఉంటే, తమకు అంతకంటే ఉన్నతమైన అధికారం ఉందని స్పష్టం చేసింది. కోర్టు అధికారం రుచి చూడాల్సి వస్తుందని, ఆ పరిస్థితి తెచ్చుకోవద్దని ఘాటుగా వ్యాఖ్యానించింది. మంచి పనులు చేసి ప్రజల మన్ననలు పొందితేనే అందరూ అంగీకరిస్తారని, చట్టబద్ధంగా, పద్ధతి ప్రకారం ముందుకెళ్లాలని హితవు పలికింది.
 
రంగారెడ్డి జిల్లా ఖానామెట్‌లోని తమ్మిడికుంట చెరువు పునరుద్ధరణ పనులకు సంబంధించి దాఖలైన కోర్టు ధిక్కరణ పిటిషన్‌పై జస్టిస్ బి. విజయ్‌సేన్‌రెడ్డి విచారణ చేపట్టారు. గత ఆదేశాల మేరకు ఆన్‌లైన్‌లో హాజరైన కమిషనర్ రంగనాథ్‌ను ఉద్దేశించి న్యాయమూర్తి ఈ వ్యాఖ్యలు చేశారు. చెరువుల పరిరక్షణ మంచిదే అయినా, అది చట్ట ప్రకారం జరగాలని సూచించారు. వారాంతాల్లో ఎలాంటి నోటీసులు ఇవ్వకుండా 50-100 గజాల స్థలాల్లోని చిన్న నిర్మాణాలను కూల్చివేస్తున్నారని, కోర్టు ఉత్తర్వులు ఆచరణలో ఉల్లంఘనకు గురవుతున్నాయని అసహనం వ్యక్తం చేశారు.
 
దీనిపై కమిషనర్ రంగనాథ్ స్పందిస్తూ, కోర్టు ఉత్తర్వులను ఉల్లంఘించే ఉద్దేశం తమకు లేదని విన్నవించారు. తమ్మిడికుంట ప్రాంతం డంపింగ్ యార్డుగా మారి, ప్రజల ఆరోగ్యం దెబ్బతింటోందని, అందుకే వైద్య వ్యర్థాలు, చెత్తను మాత్రమే తొలగించామని వివరించారు. కోర్టు స్టే ఇచ్చిన వెంటనే పనులు నిలిపివేశామని తెలిపారు. పిటిషనర్ తరఫు న్యాయవాది వాదిస్తూ, కోర్టు ఆదేశాల తర్వాత కూడా పనులు కొనసాగించారని, దీనివల్ల భూములు ముంపునకు గురయ్యాయని పేర్కొన్నారు. ఇరుపక్షాల వాదనలు విన్న న్యాయమూర్తి, తదుపరి విచారణను ఈనెల 27వ తేదీకి వాయిదా వేశారు.