మహిళల క్రికెట్ సరికొత్త చరిత్ర.. వ్యూయర్‌షిప్‌లో పురుషులతో సమం

మహిళల క్రికెట్‌కు ప్రజాదరణ ఏ స్థాయిలో పెరిగిందో ఇటీవలి ప్రపంచకప్ ఫైనల్ వీక్షకుల సంఖ్య స్పష్టం చేస్తోంది. హర్మన్‌ప్రీత్ కౌర్ నేతృత్వంలోని భారత మహిళల జట్టు తొలిసారి వన్డే ప్రపంచకప్ గెలిచిన చారిత్రక ఫైనల్ మ్యాచ్, ఏకంగా 185 మిలియన్ల వ్యూయర్‌షిప్‌ను సాధించి సంచలనం సృష్టించింది. ఈ సంఖ్య 2024లో రోహిత్ శర్మ సారథ్యంలోని పురుషుల జట్టు గెలిచిన టీ20 ప్రపంచకప్ ఫైనల్ వీక్షకుల సంఖ్యతో సమానం కావడం విశేషం.

దక్షిణాఫ్రికాపై 52 పరుగుల తేడాతో టీమిండియా విజయం సాధించి కప్ కైవసం చేసుకున్న ఈ ఫైనల్ మ్యాచ్‌కు అసాధారణమైన ఆదరణ లభించింది. పురుషుల క్రికెట్‌తో సమానంగా మహిళల క్రికెట్ కూడా వీక్షకులను ఆకట్టుకుంటోందని ఈ గణాంకాలు నిరూపిస్తున్నాయి. ఇది మహిళల క్రికెట్ ప్రజాదరణలో ఒక మైలురాయిగా నిలుస్తోంది.

కేవలం ఫైనల్ మ్యాచ్ మాత్రమే కాదు, మొత్తం టోర్నమెంట్‌కు కూడా భారీ స్పందన వచ్చింది. ఈ టోర్నమెంట్ మొత్తం డిజిటల్ రీచ్ 446 మిలియన్లకు చేరింది. ఈ సంఖ్య గత మూడు ఐసీసీ మహిళల ప్రపంచకప్‌ల మొత్తం రీచ్ కంటే ఎక్కువ కావ‌డం గమ‌నార్హం. అంతేకాకుండా నవంబర్ 2న భారత జట్టు చారిత్రక ట్రోఫీని అందుకుంటున్న క్షణంలో గరిష్ఠంగా 21 మిలియన్ల మంది వీక్షించారు. ఈ అద్భుతమైన గణాంకాలు మహిళల క్రికెట్‌లో ఒక కొత్త శకానికి నాంది పలుకుతున్నాయని క్రీడా విశ్లేషకులు అభిప్రాయపడుతున్నారు.