కబ్జాదారుల నుంచి భూముల స్వాధీనం.. 'హైడ్రా'కు మద్దతుగా ర్యాలీలు

హైదరాబాద్ నగరంలో ప్రభుత్వ భూములను కబ్జాదారుల చెర నుంచి విడిపించేందుకు ఏర్పాటైన 'హైడ్రా' సంస్థకు ప్రజల నుంచి అపూర్వ మద్దతు లభిస్తోంది. వందల కోట్ల రూపాయల విలువైన పార్కులు, ప్రజా అవసరాల స్థలాలను కాపాడినందుకు కృతజ్ఞతగా కొండాపూర్, మణికొండ వాసులు ర్యాలీలు నిర్వహించి తమ అభినందనలు తెలిపారు. 

వివరాల్లోకి వెళితే, ఇటీవల కొండాపూర్‌లోని రాఘవేంద్ర కాలనీలో సుమారు రూ.30 కోట్ల విలువైన 2,000 గజాల పార్కు స్థలాన్ని 'హైడ్రా' అధికారులు కబ్జాదారుల నుంచి స్వాధీనం చేసుకున్నారు. దీనికి సమీపంలోనే ఉన్న ఉస్మానియా యూనివర్సిటీ ప్రొఫెసర్ల కాలనీలో పాఠశాల వంటి ప్రజా అవసరాల కోసం కేటాయించిన 4,300 గజాల స్థలాన్ని కూడా కాపాడారు. దీని విలువ రూ.86 కోట్లు ఉంటుందని అంచనా. దీంతో ఆనందం వ్యక్తం చేసిన స్థానిక మహిళలు, పిల్లలు ప్లకార్డులతో ర్యాలీ నిర్వహించి 'హైడ్రా'కు ధన్యవాదాలు తెలిపారు.

అదేవిధంగా, మణికొండ మున్సిపాలిటీ పరిధిలోని సుమారు 15 కాలనీల ప్రజలు 'మర్రి చెట్టు' ప్రాంతంలో భారీ ర్యాలీ చేపట్టారు. "మణికొండ థాంక్స్ హైడ్రా" వంటి నినాదాలతో కూడిన ప్లకార్డులు ప్రదర్శించారు. తమ ప్రాంతంలో రూ.1,000 కోట్లకు పైగా విలువైన పార్కులు, ఖాళీ స్థలాలను 'హైడ్రా' కాపాడిందని, నగరాన్ని పచ్చగా ఉంచడంలో కీలక పాత్ర పోషిస్తోందని వారు ప్రశంసించారు.