హాట్ టాపిక్ గా మారిన 'ది గర్ల్ ఫ్రెండ్'

ఇప్పుడు యూత్ అంతా ఒక సినిమా కోసం వెయిట్ చేస్తోంది .. ఆ సినిమా పేరే 'ది గర్ల్ ఫ్రెండ్'. ఇది యూత్ ను దృష్టిలో పెట్టుకుని రూపొందించిన సినిమా అనే విషయం టైటిల్ తోనే అర్థమైపోతుంది. లవ్ .. లవర్స్ .. రొమాన్స్ .. ఎమోషన్స్ ఈ జోనర్ కథల్లో సాధారణంగా కనిపిస్తూనే ఉంటాయి. అయితే ఆ అంశాలు ఈ కథలో కాస్త ఘాటుగానే టచ్ చేశారనే విషయాన్ని ట్రైలర్ స్పష్టం చేసింది. ట్రైలర్ రిలీజ్ తరువాత ఈ సినిమాపై అంచనాలు ఒక్కసారిగా పెరిగిపోయాయి. 

 రష్మిక - దీక్షిత్ శెట్టి ప్రధానమైన పాత్రలను పోషించిన ఈ సినిమాకి, రాహుల్ రవీంద్రన్ దర్శకత్వం వహించాడు. ఈ సినిమాలో రొమాంటిక్ సీన్స్ కాస్త గట్టిగానే ఉన్నాయనే విషయం ట్రైలర్ తరువాతనే యూత్ కి అర్థమైంది. దాంతో ఇప్పుడు ఈ సినిమా గురించే వాళ్లంతా మాట్లాడుకుంటున్నారు. తెలుగు .. తమిళ .. కన్నడ .. హిందీ భాషల్లో రష్మిక జోరు ఒక రేంజ్ లో కొనసాగుతున్న సమయంలో, ఆమె నుంచి ఈ తరహా సినిమా ఒకటి వస్తుండటం విశేషంగా చెప్పుకుంటున్నారు. 

ఈ మధ్య కాలంలో ఈ స్థాయి స్టార్ హీరోయిన్ చేసిన రొమాంటిక్ మూవీ ఏదీ తెరపైకి రాలేదు. ఇక రష్మిక ఈ తరహా పాత్రను చేయడం కూడా ఇదే మొదటిసారి అని చెప్పుకోవచ్చు. హేషమ్ అబ్దుల్ వాహెబ్ సమకూర్చిన సంగీతం ఈ సినిమాకి హైలైట్ గా నిలవడం ఖాయమనే టాక్ బలంగానే వినిపిస్తోంది. ఈ నెల 7వ తేదీన దాదాపు అరడజను సినిమాలు రిలీజ్ అవుతున్నా, 'ది గర్ల్ ఫ్రెండ్' మూవీకే బజ్ ఎక్కువగా ఉంది. ఈ సినిమాతో రష్మిక మరో హిట్ ను తన ఖాతాలో వేసుకుంటుందేమో చూడాలి.