మంత్రి నారా లోకేశ్ 70వ ప్రజాదర్బార్... వెల్లువెత్తిన జనం

ఆంధ్రప్రదేశ్ ఐటీ, విద్యాశాఖ మంత్రి నారా లోకేశ్ చేపట్టిన ప్రజాదర్బార్ కార్యక్రమం 70వ రోజుకు చేరుకుంది. నేడు మంగళగిరిలోని టీడీపీ కేంద్ర కార్యాలయంలో నిర్వహించిన ఈ కార్యక్రమానికి ప్రజలు, పార్టీ కార్యకర్తలు భారీ సంఖ్యలో తరలివచ్చారు. తమ సమస్యలను నేరుగా మంత్రి దృష్టికి తీసుకెళ్లేందుకు ఉదయం నుంచే పెద్ద ఎత్తున కార్యాలయానికి చేరుకున్నారు.

ఉదయం 11 గంటలకు ప్రారంభమైన ప్రజాదర్బార్ నిరంతరాయంగా కొనసాగుతోంది. మంత్రి లోకేశ్ ప్రతి ఒక్కరి వద్దకు స్వయంగా వెళ్లి వారి సమస్యలను ఓపికగా విన్నారు. దాదాపు మూడు గంటల వ్యవధిలోనే ఆయన సుమారు 2 వేల మందిని కలిసి వారి నుంచి వినతిపత్రాలు స్వీకరించారు. ప్రజలను ఆప్యాయంగా పలకరిస్తూ, వారి కష్టసుఖాలను అడిగి తెలుసుకున్నారు.

వినతులు స్వీకరించిన వెంటనే, సంబంధిత సమస్యల పరిష్కారం కోసం మంత్రి లోకేశ్ అక్కడికక్కడే తన సిబ్బందికి, అధికారులకు తక్షణ ఆదేశాలు జారీ చేశారు. తనను కలిసేందుకు వచ్చిన వారితో ఆయన ఫోటోలు కూడా దిగారు. క్యూలో ఉన్న చివరి వ్యక్తిని కలిసే వరకు ప్రజాదర్బార్ కొనసాగుతుందని మంత్రి కార్యాలయ వర్గాలు స్పష్టం చేశాయి. ప్రజల సమస్యల పరిష్కారానికే తన తొలి ప్రాధాన్యత అని లోకేశ్ తన కార్యాచరణ ద్వారా మరోసారి నిరూపించారు.