రేపే వరల్డ్ కప్ ఫైనల్... గెలిస్తే మనమ్మాయిల పంట పండినట్టే!

మహిళల వన్డే ప్రపంచకప్ 2025లో భారత జట్టు చరిత్ర సృష్టించేందుకు అడుగు దూరంలో నిలిచింది. ముంబయి వేదికగా ఆదివారం జరిగే ఫైనల్‌లో దక్షిణాఫ్రికాతో తలపడనుంది. సెమీస్‌లో బలమైన ఆస్ట్రేలియాను ఓడించి ఆత్మవిశ్వాసంతో బరిలోకి దిగుతున్న హర్మన్‌ప్రీత్ సేన, ఈసారి ఎలాగైనా కప్ గెలవాలని పట్టుదలగా ఉంది. ఈ కీలక మ్యాచ్‌కు ముందు, భారత అమ్మాయిలకు ఓ భారీ శుభవార్త వినిపిస్తోంది. ఒకవేళ భారత జట్టు ప్రపంచకప్ గెలిస్తే, రూ.125 కోట్ల భారీ నజరానాను ప్రకటించేందుకు భారత క్రికెట్ నియంత్రణ మండలి (BCCI) సిద్ధమవుతున్నట్లు సమాచారం.

పురుషులు, మహిళా క్రికెటర్లకు సమాన వేతనాలు అమలు చేస్తున్న బీసీసీఐ, ప్రైజ్‌మనీ విషయంలోనూ అదే విధానాన్ని అనుసరించాలని భావిస్తోంది. ఇటీవలే 2024 టీ20 ప్రపంచకప్ గెలిచిన రోహిత్ శర్మ నేతృత్వంలోని భారత పురుషుల జట్టుకు ఆటగాళ్లు, సహాయక సిబ్బందికి కలిపి రూ.125 కోట్లు బహుమతిగా అందించింది. ఇప్పుడు మహిళల జట్టు కూడా విశ్వవిజేతగా నిలిస్తే, అంతే మొత్తంలో బోనస్ ఇవ్వాలని బీసీసీఐ వర్గాల్లో చర్చలు జరుగుతున్నట్లు తెలుస్తోంది.

ఈ విషయంపై బీసీసీఐ వర్గాలు మీడియాతో మాట్లాడుతూ.. "పురుషులతో సమానంగా మహిళల జట్టుకు కూడా నజరానా ప్రకటించడంపై చర్చలు జరుగుతున్నాయి. అయితే, జట్టు ప్రపంచకప్ గెలవక ముందే దీనిపై అధికారిక ప్రకటన చేయడం సరైనది కాదు" అని పేర్కొన్నాయి.

భారత మహిళల జట్టు ప్రపంచకప్ ఫైనల్‌కు చేరడం ఇది మూడోసారి. 2005, 2017లో ఫైనల్ చేరినా టైటిల్ గెలవలేకపోయింది. ముఖ్యంగా 2017లో లార్డ్స్ వేదికగా ఇంగ్లాండ్‌తో జరిగిన ఫైనల్‌లో కేవలం 9 పరుగుల తేడాతో ఓటమి పాలైంది. అప్పుడు బీసీసీఐ జట్టులోని ప్రతి క్రీడాకారిణికి రూ.50 లక్షలు, సహాయక సిబ్బందికి రూ.25 లక్షల చొప్పున ప్రైజ్‌మనీ అందించింది. ఈసారి కప్ గెలిచి చరిత్ర సృష్టిస్తే, వారికి భారీ ప్రోత్సాహం అందించాలని బోర్డు భావిస్తోంది. ఈ వార్త ఫైనల్‌కు ముందు అమ్మాయిల్లో మరింత ఉత్సాహాన్ని నింపడం ఖాయం.