మూలపాడు కొండల్లో 'హ్యాపీ ఫారెస్ట్ రన్'.. ప్రకృతి ఒడిలో ఉత్సాహంగా పరుగులు

నగర జీవితంలోని ఉరుకులు పరుగుల నుంచి సేద తీరుతూ, ప్రకృతి ఒడిలో గడిపేందుకు నిర్వహించిన 'హ్యాపీ ఫారెస్ట్ రన్'కు అద్భుతమైన స్పందన లభించింది. విజయవాడ నగరానికి సుమారు 40 కిలోమీటర్ల దూరంలో, ఇబ్రహీంపట్నం మండలం మూలపాడు బటర్‌ఫ్లై పార్క్ వద్ద ట్రైమెట్రిక్స్ సంస్థ ఆదివారం ఈ కార్యక్రమాన్ని విజయవంతంగా నిర్వహించింది. పచ్చని కొండకోనల మధ్య సాగిన ఈ రన్‌లో 160 మందికి పైగా ఔత్సాహికులు పాల్గొన్నారు.

16కే, 8కే విభాగాల్లో జరిగిన ఈ ట్రయల్ రన్‌లో చిన్నారులు, యువకులు, గృహిణులు, వృద్ధులు ఎంతో ఉత్సాహంగా పాలుపంచుకున్నారు. కాంక్రీట్ రోడ్లకు బదులుగా మట్టి దారుల్లో, పచ్చని చెట్ల నీడలో, చిన్న చిన్న మడుగులను దాటుకుంటూ ముందుకు సాగారు. పక్షుల కిలకిలరావాలు, అందమైన పూల సువాసనలు, సెలయేటి సవ్వడులు, రంగురంగుల సీతాకోకచిలుకల సోయగాలను ఆస్వాదిస్తూ స్వచ్ఛమైన గాలిని పీల్చుకున్నారు.

రోజువారీ జీవితంలో ఎదురయ్యే మానసిక ఒత్తిడిని దూరం చేసుకుని, ప్రకృతితో మమేకమయ్యేందుకు ఈ రన్ చక్కని అవకాశాన్ని కల్పించిందని పాల్గొన్న వారు ఆనందం వ్యక్తం చేశారు. పరుగును దిగ్విజయంగా పూర్తి చేసిన ప్రతి ఒక్కరికీ నిర్వాహకులు మెడల్స్ అందజేశారు. ఈ మధురానుభూతులతో వారంతా ఆనందంగా తిరుగు ప్రయాణమయ్యారు.