కోహ్లీ ఖాతాలో మరో ఘనత... రెండో స్థానానికి చేరిన కింగ్!

టీమిండియా స్టార్ బ్యాటర్, పరుగుల యంత్రం విరాట్ కోహ్లీ వన్డే ఫార్మాట్‌లో మరో అరుదైన రికార్డును తన ఖాతాలో వేసుకున్నాడు. శ్రీలంక దిగ్గజ ఆటగాడు కుమార సంగక్కరను అధిగమించి, వన్డేల్లో అత్యధిక పరుగులు చేసిన రెండో ఆటగాడిగా చరిత్ర సృష్టించాడు. ఆస్ట్రేలియాతో శనివారం సిడ్నీ వేదికగా జరిగిన మూడో వన్డేలో ఈ ఘనత సాధించాడు. ఈ జాబితాలో ప్రస్తుతం మాస్టర్ బ్లాస్టర్ సచిన్ టెండూల్కర్ మాత్రమే కోహ్లీ కంటే ముందున్నాడు.

ఈ మ్యాచ్‌కు ముందు తొలి రెండు వన్డేల్లో పెద్దగా రాణించలేకపోయిన కోహ్లీ, కీలకమైన ఆఖరి మ్యాచ్‌లో తనదైన శైలిలో చెలరేగాడు. ఈ క్రమంలోనే 14,234 పరుగులతో రెండో స్థానంలో ఉన్న సంగక్కర రికార్డును తన 293వ ఇన్నింగ్స్‌లోనే బద్దలు కొట్టాడు. వన్డే క్రికెట్‌లో సచిన్ టెండూల్కర్ 18,426 పరుగులతో అగ్రస్థానంలో కొనసాగుతున్నాడు. అయితే, ఈ జాబితాలోని టాప్ 10 ఆటగాళ్లలో ఎవరికీ లేనంత పరుగుల సగటు (57.69) కోహ్లీ సొంతం కావడం విశేషం. సచిన్ సగటు 44.83గా ఉంది.

ఇక మ్యాచ్ విషయానికొస్తే, ఛేదనలో కోహ్లీ మరోసారి తన మార్క్ చూపించాడు. అజేయంగా 74 పరుగులు చేసి, తన వన్డే కెరీర్‌లో 75వ హాఫ్ సెంచరీ పూర్తి చేసుకున్నాడు. ఈ మ్యాచ్‌లో రోహిత్ శర్మ సెంచరీతో కదం తొక్కాడు. కోహ్లీ, రోహిత్ కలిసి రెండో వికెట్‌కు 168 పరుగుల అద్భుత భాగస్వామ్యం నెలకొల్పడంతో భారత్ 9 వికెట్ల తేడాతో ఘన విజయం సాధించింది.

ఈ విజయంతో భారత్ క్లీన్‌స్వీప్ నుంచి తప్పించుకున్నప్పటికీ, ఆస్ట్రేలియా 2-1 తేడాతో సిరీస్‌ను కైవసం చేసుకుంది. సిరీస్‌లో మొత్తం 202 పరుగులు చేసిన రోహిత్ శర్మకు 'ప్లేయర్ ఆఫ్ ది మ్యాచ్', 'ప్లేయర్ ఆఫ్ ది సిరీస్' అవార్డులు దక్కాయి. ఇరు జట్ల మధ్య అక్టోబర్ 29 నుంచి ఐదు మ్యాచ్‌ల టీ20 సిరీస్ ప్రారంభం కానుంది.