ఓటమికి కారణం అదే... సిరీస్ పరాజయంపై భారత కెప్టెన్ గిల్ స్పందన

ఆస్ట్రేలియాతో జరిగిన రెండో వన్డేలో టీమిండియా ఓటమి పాలైంది. అడిలైడ్ ఓవల్ మైదానంలో జరిగిన ఈ మ్యాచ్‌లో రెండు వికెట్ల తేడాతో ఓడిపోవడమే కాకుండా, వన్డే సిరీస్‌ను కూడా 0-2తో కోల్పోయింది. అయితే, ఈ ఓటమికి తమ ఫీల్డింగ్ తప్పిదాలే ప్రధాన కారణమని భారత కెప్టెన్ శుభ్‌మన్ గిల్ స్పష్టం చేశాడు. కీలక సమయంలో క్యాచ్‌లు జారవిడచడం వల్లే 264 పరుగుల స్కోరును కాపాడుకోలేకపోయామని ఆవేదన వ్యక్తం చేశాడు.

మ్యాచ్ అనంతరం గిల్ మాట్లాడుతూ, "బోర్డుపై మేం చేసిన పరుగులు సరిపోతాయనే అనుకున్నాం. కానీ, కీలక ఆటగాళ్ల క్యాచ్‌లను జారవిడిస్తే ఏ లక్ష్యాన్నైనా కాపాడుకోవడం చాలా కష్టం" అని అన్నారు. ఈ మ్యాచ్‌లో 74 పరుగులతో రాణించిన మ్యాట్ షార్ట్ క్యాచ్‌ను భారత ఫీల్డర్లు రెండుసార్లు నేలపాలు చేశారు. ఈ తప్పిదాలే మ్యాచ్ ఫలితాన్ని శాసించాయని గిల్ పరోక్షంగా అంగీకరించాడు. అయితే, రెండో మ్యాచ్‌లో టాస్ పెద్దగా ప్రభావం చూపలేదని, ఇరు జట్లు దాదాపు 50 ఓవర్లు ఆడాయని, పిచ్ కూడా 15-20 ఓవర్ల తర్వాత బ్యాటింగ్‌కు అనుకూలించిందని అభిప్రాయపడ్డాడు.

ఇదే సమయంలో, చాలా కాలం తర్వాత తిరిగి జట్టులోకి వచ్చి అద్భుతంగా పోరాడిన రోహిత్ శర్మ (97 బంతుల్లో 73)పై గిల్ ప్రశంసలు కురిపించాడు. "సుదీర్ఘ విరామం తర్వాత బరిలోకి దిగి ఇలా ఆడటం అంత సులభం కాదు. ఆరంభంలో ఎంతో పోరాడి కీలక ఇన్నింగ్స్ ఆడాడు. అతను భారీ స్కోరు చేసే అవకాశాన్ని కోల్పోయాడని నేను భావిస్తున్నాను" అని గిల్ పేర్కొన్నాడు.

మరోవైపు, సిరీస్ గెలుపుపై ఆస్ట్రేలియా కెప్టెన్ మిచెల్ మార్ష్ ఆనందం వ్యక్తం చేశాడు. యువ ఆటగాళ్లు షార్ట్, కనోలీ అర్ధ సెంచరీలతో రాణించడం ఆస్ట్రేలియా క్రికెట్ ఉజ్వల భవిష్యత్తుకు సంకేతమని అన్నాడు. నాలుగు వికెట్లతో భారత పతనాన్ని శాసించి 'ప్లేయర్ ఆఫ్ ది మ్యాచ్'‌గా నిలిచిన స్పిన్నర్ ఆడమ్ జంపా, ప్రపంచంలోని అత్యుత్తమ జట్టు అయిన భారత్‌పై గెలవడం ఆనందంగా ఉందని చెప్పాడు. తమ పేసర్లు పవర్‌ప్లేలో అద్భుతంగా బౌలింగ్ చేసి తన పనిని సులభతరం చేశారని, కెప్టెన్ మార్ష్ ప్రశాంతమైన నాయకత్వ పటిమ కూడా తమకు కలిసొచ్చిందని జంపా వివరించాడు.